News-Details

Anteriurs gardists en claustra

27.08.2018

DA HANS HUONDER / ANR

Ier dumengia ha la secziun dalla Svizra orientala dils anteriurs gardists papals salvau sia dieta a Mustér. Igl ei in da plirs arranschaments regulars ch’ella organisescha. La secziun ei vegnida fundada 1960 e dumbra oz 220 commembers. Sper la secziun dalla Svizra centrala eis ella la gronda enteifer l’uniun tetgala che dumbra en tut 13 secziuns cun rodund 1000 commembers. Sco quei ch’il president dalla secziun, Simon Krummenacher da Waldkirch di, entran rodund duas tiarzas dils anteriurs gardists en ina dallas secziuns suenter lur survetsch a Ruma. La dumengia ei la secziun dalla Svizra orientala
s’entupada a Mustér per sia dieta che ha liug mintga dus onns. Suenter il survetsch divin ed in apero
ein ils anteriurs gardists serendi en ina processiun en claustra nua che la dieta ha giu liug. Sco
quei che Simon Krummenacher ha detg, ei quei in da plirs arranschaments:
«Nus purschin mintg’onn sis entochen siat caschuns da sentupada a nos commembers. Quei ein seras da gril, visetas da menaschis ni era occasiuns ecclesiasticas. Ils davos onns havein nus era constatau che visetas da castials interesseschan biars commembers. Nus lessen veramein empruar da tgirar ina buna cameradaria.» Adina puspei ha la dieta era liug el Grischun. Pliras ga ein ins staus a Domat ed igl
onn 2004 a Sursaissa. Simon Krummenacher presidiescha la secziun dapi igl onn 2014. El ei il sisavel cau da quella dapi la fundaziun avon 58 onns.