News-Details

Center da sport e cultura cuntinuescha

27.08.2018

(anr/hh) La planisaziun dalla sanaziun e cumpletaziun dil Center da sport e cultura a Mustér cuntinuescha. Il venderdis sera ha il cussegl da vischnaunca concediu persuenter in credit supplementar da 119'000 francs. Plinavon ha el tractau la revisiun dalla lescha d’agricultura. La lescha d’agricultura actuala datescha digl onn 2008. Damai
ch’ella ed ils contracts d'affittaziun corrispundan buca pli allas prentensiuns dad oz, ha la suprastonza communala eligiu avon rodund miez onn ina cumissiun per preparar ina revisiun parziala. Quella ei vegnida presidiada dil cusseglier Wendelin Jacomet, sco representant
dalla suprastonza communala ei il gerau dil departament Clemens Berther staus involvius. Ina dallas midadas essenzialas en quei connex pertucca in regulativ da taxas. La cumissiun ei stada dil meini da scaffir in tal, surtut per levgiar la lavur administrativa. En fuorma d’ina emprema lecziun ha il parlament communal tractau la lescha il venderdis sera. El ha suttamess differentas propostas per midadas ed adattaziuns alla cumissiun. La decisiun
finala concernent quella lescha duei vegnir prida en ina dallas proximas sedutas dil cussegl da vischnaunca. Plinavon ha il parlament communal priu enconuschientscha dil regulativ da taxas per la lescha d’agricultura sco era dil niev contract d'affittaziun che vala per la gudida
da pastiras e per l’alpegiaziun. Per saver contrahar da niev culs affittaders vegnan tuts contracts da gudiment da pastira ch'ein avon maun visai.

Credit supplementar pil CSC
Il mars 2017 ha il cussegl da vischnaunca concediu in credit da planisaziun da 375’000 francs per la sanaziun e cumpletaziun dil Center da sport e cultura (CSC). L’incarica ei vegnida surdada al biro d’architectura huonder bisquolm architects da Mustér sin basa d’ina procedura
da submissiun. Sper la lavur d’architect cumpeglia l’incarica era las retschercas concernent ils planisaders dil fatg, denter auter pertuccont energia, tecnica da casa, electricitad ni era statica. En connex cun quella surdada han ins quintau cun ina summa da baghegiar da sis milliuns francs. La finamira ei stada da presentar al cussegl da vischnaunca ina soluziun per ina sanaziun cumplessiva cun differentas innovaziuns pigl entir CSC. En connex cun quella lavur da planisaziun eis ei denton semussau ch’il project da sanaziun e cumpletaziun contonscha ina tut autra summa che previu ordiundamein, numnadamein ina tala da
biebein endisch milliuns francs. Quella summa sto aschia era vegnir risguardada per definir il honorari dil biro d’architectura. Per quei motiv ha il cussegl da vischnaunca giu da sefatschentar tscheidi da quei credit supplementar net da 119’000 francs. El ha concediu quei credit supplementar per preparar la planisaziun dalla sanaziun cumplessiva dil Center da sport e cultura sin fundament dalla nova summa da baghegiar da rodund 15 milliuns. La decisiun ei curdada cun 13 encunter ina vusch. Parallelamein ha el decidiu da suttametter quei conclus al referendum facultativ.

Sanaziun necessaria
L’entschatta zercladur ei il cussegl da vischnaunca sefatschentaus dil project da sanaziun e cumpletaziun dil CSC. El ha returnau la fatschenta alla suprastonza communala, respectivamein alla cumissiun cun l’incarica da reponderar differents elements dalla cumpletaziun. Il Center da sport e cultura a Mustér ei prest 40 onns vegls. En quels rodund
quater decennis eis el vegnius cumpletaus ed adattaus, denter auter 1993 cun la Sala Fontauna e la plazza da ballapei. Avon sis onns ei ina gronda part dils indrezs ordaviert vegnida remplazzada e sanada per bunamein in milliun francs ed avon dus onns ei vegniu investau ella sanaziun dallas fatschadas dil nord e vest. La gronda part dil baghetg ei denton
aunc adina el stan da 1980 e basegna ina sanaziun. En connex culs projects gronds che vegnan realisai ni ch’ein sin rucca il mument a Mustér sto la vischnaunca far ponderaziuns da meglierar ed adattar l’infrastructura dil Center da sport e cultura sco purschida per hosps da vacanzas, mo era pils indigens.