News-Details

Investiziuns e critica

30.08.2018

DA HANS HUONDER / ANR

Era igl onn da fatschenta passau han las Pendicularas Mustér SA stuiu nudar in deficit. Quel ei denton meins aults ch’ils onns avon. El rapport annual gest cumparius informescha il president dil cussegl d’administraziun, Marcus Weber, davart il stan dallas investiziuns. Sigl unviern vegnent vegn in’emprema part dil Catrina Resort en funcziun aschibein sco in’emprema etappa dils indrezs d’ennevar. Perencunter reussescha ei buca da metter en funcziun la pendiculara nova a Sedrun sigl unviern vegnent. Sco quei ch’il directur Ruedi Büchi di ei il temps a disposiziun per baghegiar la pendiculara memia stretgs per vegnir a fin sil december. En siu rapport annual critichescha Weber igl agir da Sedrun Mustér Turissem. Essend che l’organisaziun da turissem vegli ir atgnas vias el marketing seigien las Pendicularas Mustér SA e l’Arena Andermatt Sedrun SA sedecididas per in’atgna societad da commercialisaziun. Il proxim temps duei il menader da quella vegnir presentaus. Finanzialmein han las Pendicularas Mustér SA danovamein giu in onn difficil. Era igl unviern vargau ei resultau in deficit da bunamein 790000 francs suenter deficits da mintgamai varga in milliun francs ils dus onns avon. En cumparegliaziun culs dus onns precedents ha ei giu igl unviern vargau memia bia neiv e biaras fins d’jamna ella secunda mesadad digl unviern ein stadas signadas da schliat’aura. Las Pendicularas Mustér SA salvan lur radunonza generala miez settember.

Las Pendicularas Mustér SA sesanflan il mument en in process da grond svilup. Quel spitgassen ils responsabels dall’interpresa era d’autras instituziuns. Per quei motiv maunca la critica lu era buc el rapport annual gest cumparius. Dapi bunamein 50 onns ein las pendicularas il motor dil svilup turistic a Mustér, surtut pertuccont igl unviern. Cun las investiziuns che l’interpresa fa ussa duei quei svilup esser persistents ed era survir ad in niev slontsch pil turissem da stad. Ils 14 da settember 2018 salva la societad acziunara ina radunonza extraordinaria e decida leu davart in augment dil capital d’aczias. Quel duei numnadamein vegnir alzaus da rodund nov milliuns francs sin biebein 12,5 milliuns francs. Sco quei ch’il cussegl d’administraziun scriva ell’invitaziun als acziunaris duei vegnir scaffiu
5000 aczias dil num novas a 700 francs. Gest suenter quella radunonza cun ina decisiun pli u meins formala che schai els mauns digl acziunari principal Marcus Weber ha la radunonza generala liug. A quella vegnan Vincent Augustin, Francestg Cajacob, Paul Christen, Martin Kreiliger e Marcus Weber proponi per la reelecziun el cussegl d’administraziun. Paolo Billi stat buc a disposiziun per ina reelecziun. Weber duei silsuenter restar president dil cussegl d’administraziun, Augustin vicepresident da quel.

Memia bia neiv

Igl unviern passau ei staus signaus da bia neiv. Suenter dus onns cun pauca neiv ei quella arrivada il november ed ha procurau per ina buna sviulta all’entschatta digl unviern tier las Pendicularas Mustér SA. Sco quei che Weber constatescha el rapport annual ei quella sviulta denton vegnida magliada si il fevrer e mars. D’ina vart pervia dalla massa neiv ch’ha pretendiu ch’il Pass dil Lucmagn resti serraus savens, dall’autra vart pervia da biaras fins d’jamna cun schliat’aura. Las Pendicularas Mustér SA han giu igl onn da fatschenta 2017/18 entradas da 5,35 milliuns ed expensas da 4,9 milliuns francs. Il gudogn avon amortisaziuns, tscheins e taglias importa 464 000 francs. Il resultat annual siara cun in deficit da bunamein 790 000 francs. Igl onn avon havevan las pendicularas fatg in deficit dad 1,46 milliuns francs.

Pendicularas van atgnas vias
La staziun da val a S. Cartina ei stada signada da lavurs da construcziun, seigi il resort niev ni era las mesiras dalla vischnaunca pertuccont igl uor dil Rein d’Acletta. El rapport annual attacca il president dil cussegl d’administraziun Marcus Weber la cooperaziun negativa cun Sedrun Mustér Turissem. Malgrad biaras discussiuns seigi ei buca reussiu d’animar l’organisaziun da turissem da separticipar ad ina commercialisaziun surregiunala dil turissem ed ina structura corrispundenta. Quei malgrad che l’Arena Andermatt Sedrun SA e las Pendicularas Mustér SA hagien mussau lur beinvulientscha en quella direcziun. Sedrun Mustér Turissem seigi sedecidius per in’atgna via ed aschia seigi ei restau nuot auter allas duas interpresas da pendicularas che da scaffir in’atgna organisaziun. Quell’organisaziun dispona d’in capital da partenza dad in milliun francs. Il proxim temps vegn la persuna operativa responsabla per quella societad presentada. «Igl ei donn ch’ils mieds che stattan a disposiziun allas autoritads localas pil turissem vegnan buca nezegiai professiunalmein», scriva Weber.

Ina part dil resort vegn en funcziun il december
Sco quei che Weber scriva medemamein el rapport annual dallas Pendicularas Mustér SA vegn ina part dil Catrina Resort en funcziun sin la stagiun d’unviern vegnenta. Previdas ein 60 habitaziuns sco era 100 letgs el hostel. Leutier la nova stizun da sport, il «Steakhaus Chevrina» e l’ustria Ursus. Medemamein duei il Coop arver sias localitads novas el resort ils 13 da december 2018. Als hosps da vacanzas dil resort eis ei previu da porscher ina purschida allinclusive, vul dir naven dalla dimora entochen cartas d’ir cun skis ed equipament. Perencunter vegn la pendiculara nova da Sedrun sil Cuolm da Vi buc en funcziun sigl unviern vegnent. Sco quei ch’il directur dallas pendicularas, Ruedi Büchi, di han las lavurs retard: «Naven dall’entschatta havein nus giu neginas reservas da temps per la construcziun dalla pendiculara nova. Damai che nus havein stuiu concepir ils fundaments per las petgas en in’autra fuorma che previu sedat uss in retardament. Sche tut va endretg lein nus far las emprovas cul menaschi niev igl unviern e lu metter en funcziun la pendiculara sin la stad vegnenta. Tut quei dependa denton era dallas relaziuns dall’aura.»