News-Details

Svilup futur pil center dil vitg

14.10.2019

DA HANS HUONDER / ANR

22 studentas e students d’architectura ein sefatschentai dalla damonda co il curtgin dalla Casa Hess a Mustér savess vegnir nezegiaus egl avegnir cun in’infrastructura da hotel. Las lavurs ch’ein da veser il proxim temps ellas anteriuras localitads dil Coop a Mustér dattan impuls persuenter. Ferton ch’ils ins proponan baghetgs plitost decents cun in contuorn verd ein ils auters dil meini ch’il spazi stoppi vegnir nezegiaus aschi bein sco pusseivel per in ni schizun plirs baghetgs. Tenor Christian Wagner, professer per architectura alla Scol’aulta specialisada dil Grischun a Cuera, ei l’incarica stada ina gronda sfida per las studentas ed ils students. D’ina vart ha ei giu num s’adattar als baghetgs dil center dil vitg, da l’autra vart da proponer ideas tecnicamein ed economicamein realisablas. Tenor il president communal Robert Cajacob duein las ideas survir ussa sco propostas als possessurs dalla parcella ni eventuals interessents.

In niev hotel el center dil vitg da Mustér?
Studentas e students d’architectura han fatg ponderaziuns co nezegiar il curtgin dalla Casa Hess

Dapi onns vegn adina puspei discussiunau a Mustér davart il nez futur dalla parcella culla Casa Hess e quei malgrad che quella ei en possess privat. Per saver far in maletg tgei che savess vegnir realisau el curtgin ha la vischnaunca incaricau ina classa d’architectas ed architects futurs dalla Scola’aulta specialisada dil Grischun a Cuera da far ponderaziuns leusuenter. Las 22 lavurs ein da veser ils proxims dis ellas anteriuras localitads dil Coop ella surbaghegiada dalla Cucagna. L’exposiziun ei aviarta sonda, ils 12 d’october, venderdis, ils 18 d’october e sonda, ils 19 d’october 2019 mintgamai dallas
16.00 entochen allas 18.00. La vernissascha dall’exposiziun ha giu liug il venderdis sera.

Tgei far culla parcella?

L’incarica che las 22 studentas ed ils students han survegniu ei stada clara: Ella part aunc buca surbaghegiada dalla parcella dalla Casa Hess duei vegnir fatg ponderaziuns co ed en tgi fuorma realisar in hotel. Sco quei che Christian Wagner, professer per architectura alla scola, di ei l’incumbensa buca stada sempla: «Denter auter ha ei giu num prender risguard dils baghetgs existents, denter auter la Casa Hess, mo lu era da vegnir a frida culla vart sut dalla parcella.» Leu sesanfla numnadamein in mir fetg ault ch’ei aschidadir ina part integrala dalla
staziun dalla viafier. «Igl ei denton era stau la finamira da dar ina plivalur al center dil vitg ed aschia da porscher qualitad el ravugl dils baghetgs existents. Mo lu era da far propostas realisablas tecnicamein, vul dir per exempel era pertuccont igl access a pei ni cun vehichels», di Wagner.

Economic e realisabel

Las studentas ed ils students han denton era stuiu proponer in hotel pusseivels da realisar e menar tenor criteris economics. «En connex cun in tal studi giogan criteris dalla scola, mo lu era dil liug sco tal ina rolla. La scola vesa tals studis era en favur dallas discussiuns che duein allura sedar quei mument ch’els ein sin meisa. Per la vischnaunca ein auters criteris d’impurtonza», di Wagner ch’ei era cussegliader d’architectura dalla vischnaunca da Mustér. Aschia ei era setschentau la damonda schebein la parcella duei vegnir surbaghegiada cumpleinamein ni sch’ella duei consister era egl avegnir d’ina part verda per exempel en fuorma d’in parc. En quei connex van las lavurs fetg ina ord l’autra. Per las studentas ed ils students ei l’incarica stada ina sfida. Ei hagi fatg grond plascher da luvrar vid quellas ideas.

Adina puspei in tema

«Il baghetg ed il curtgin dalla parcella Hess amiez il vitg ein dapi onns in tema da discussiun. Ins sedamonda adina puspei tgei ch’ins savess far leu, quei malgrad che la parcella ei en possess privat», di il president communal Robert Cajacob. Alla vischnaunca seigi ei buca tuttina tgei che schabegi leu in di: «Per dir ch’ins realisescha leu enzatgei munglass ei ir a prau cul vitg ed esser ina plivalur en favur dil center.» En connex cun la revisiun dalla planisaziun locala seigi il curtgin danovamein daventaus in tema. «La finamira da quels studis ei secapescha da saver presentar pusseivladads als possessurs dalla parcella ni ad eventuals interessents da quella. La vischnaunca vul dar impuls, in diever entras la vischnaunca vegn buc en damonda suenter che la casa communala ei vegnida sanada avon entgins onns», di Cajacob. El constatescha che la vi schnaunca dispona oz en quei senn buca d’in center dil vitg. Cun ina surbaghegiada nova fussi ei pusseivel da dar novs impuls en quella direcziun. Daco ein ins lu gest ve gnius sill’idea da schar far studis pertuccont in hotel en quei liug. «Nus havein oz memia paucs letgs d’hotel ed era ustrias pudess ei vertir suenter ch’igl ei vegniu
baghegiau biaras habitaziuns el Catrina Resort. Il project pil hotel Acla da Fontauna preveda medemamein biaras habitaziuns. Jeu creiel che la glieud havessi il giavisch da vegnir el vitg e saver guder cheu ulteriura purschida», puntuescha Cajacob. Treis dils 22 studis ein vegni premiai. Igl ei quels d’Eveline Bolliger, Lukas Zeller e Simon Wyss.

La vischnaunca ha fatg in’offerta per la parcella dalla Casa Hess

Sco quei ch’il president communal da Mustér, Robert Cajacob, ha detg sin damonda dall’Agentura da novitads rumantscha ha la vischnaunca fatg in’offerta per la cumpra dalla parcella e la Casa Hess: «Ell’ei venala e cun noss’offerta havein nus vuliu demussar nies interess, respectivamein l’impurtonza che quella parcella e casa han per Mustér.» Il prezi dall’offerta ha el buca vuliu tradir: «Noss’offerta sebasa sil schazetg.» L’offerta seigi vegnida inoltrada la stad, entochen ussa hagien ins buca survegniu ina risposta. Aschilunsch che la                 vischnaunca vegnessi risguardada vegnessien ins a contactar eventuals interessents per examinar il diever futur. Tenor Cajacob ei la casa sezza sut protecziun da monuments.