News-Details

Co il mund ei pigns

15.10.2019

Cun Camp Cadi 2 ein 33 giuvenils dalla Cadi e Breil serendi per ina jamna en Belgia. Beinenquala surpresa speciala vein nus astgau guder, schizun talas che han fatg smarvigliar nus zun fetg…

Igl ei buca l’emprema gada che nus serendin en Belgia, pli exact ad Antwerpen, el center cultural dalla tiara. Sin fundament dallas experientschas fatgas las davosas gadas vein nus midau empau il program. Rosmarie e Gion Christoffel da Viadis Christoffel han ina gada dapli menau nus saunamein el liug e lu puspei anavos. Sin las vias cun fetg bia traffic secapescha quei buca da sesez. Ils giuvenils han gudiu la cuminonza e giu bia aventuras communablas. Ei ha dau bia leghers muments, era sche l’aura ei buca stada dotada cun bia sulegl. Nossa emprema supresa speciala vein nus gia giu la dumengia endamaun. Cul bastiment essan nus serendi viadora el port da mar – il secund grond dall’Europa. Strusch sil bastiment ei in ulteriur menader da gruppa vegnius tier nus e dumandau danunder che nus seigien. Udend che nus vegnien dil contuorn da Mustér, ha el entschiet a raquintar da sias aventuras sin skis a Caischavedra, ferton ch’il bastiment ei passaus sper auters vi, sper nundetgas surfatschas da containers e hallas. Il suentermiezdi ei medemamein staus fetg impressiunonts: Pieder Decurtins da Trun ha envidau nus ad ina cuorsa d’autos a Zolder. Pils biars ei quei stau zatgei niev e buca mo ils giuvens han giu plascher dad esser ina gada davos las culissas e mirar co tut funcziuna. Bugen vessen nus viu in victur sursilvan, denton l’aura ed in incap tecnic han fatg in streh tras il quen e smardigliau las bunas schanzas dil bien plaz dil di avon. Igl gliendisdis ha tgunsch schau anavos las pli grondas impressiuns, quei tenor ils rapports da nos participonts. Ad Ypres vein nus visitau in museum interactiv davart l’emprema uiara mundiala. A moda fetg impressiunonta han tuts saviu s’informar davart quei temps sgarscheivel. Silsuenter vein nus visitau il santeri britanic Tyne Cot a Zonnebeke: las bunamein 40’000 fossas fan impressiun, cunzun las inscripziuns sils crapsfossa: umens denter 17 e 35 onns che han schau lur veta per lur patria – senza ver viu zatgei dalla veta e tut pervia da vanagloria dad in pèr signurs. Co ils sfoss originals, els quals igl ei vegniu cumbattiu duront onns vesevan ora, vein nus lu mirau
cuort sisu a Diksmuide. Il mardis vein nus visitau il casti da Gent e silsuenter il marcau dad Oostende sper la Mar dil Nord. La mesjamna ei stada reservada alla capitala dalla tiara – per Brüssel. Nus essan stai envidai dalla Tiaratudestga el parlament europeic cun viseta dalla sala plenara. Buca pauc surstai – e quei ei stau nossa secunda gronda surpesa – essan nus dil beinvegni da nies guid tudestg: avon 28 onns ha el gidau da replantar igl uaul devastau entras igl orcan Vivian sur Curaglia ed el leva saver co quel seigi carschius. Mo era el era loschs da ver nus tier el, e la classa da Bochum, ord sia patria e che era cun nus ensemen,
ei aschia curdada empau ell’umbriva dalla Cadi. Allura essan nus serendi el marcau, vein mirau las grondas attracziuns ed era contemplau il palast dil retg. Gievgia e venderdis ven nus nezegiau  per prender sut la marella il marcau dad Antwerpen. El quatier da diamants vein nus visitau in moladiamants che ha declarau a nus sia lavur, lu era la staziun bumbastica ed ina brassaria agl ur dil marcau nua che la bubronda naziunala, la gervosa, vegn producida. La degustaziun ei stada reservada a quels sur 16 onns. Persuenter han lu las stizuns da cumpra attratg l’attenziun dils ulteriurs. Ah gie – maunca aunc la tiarza surpresa ella staziun nua ch’ina dunna beltga damonda nus directamein schebein nus discuorien romontsch. Savend che biars Svizzers gnanc enconuschan nies lungatg mumma, fa ina tala damonda surstar. Il viadi anavos atras la Flandria, Vallonia, Lorraine ed Alsazia succeda senza incaps ed aschia arrivein nus la sera tard puspei a casa. Il camp ha plaschiu fetg bein, ei resta denton in larmin: nossa menadra Marie Rose Deflorin dat adia al team da menaders suenter 18 onns. Dapi 2001 segida ella nunstunclentusamein vid ils camps ed ei era in dils motivs daco che nus visitein regularmein sia patria, la Belgia. Ad ella, sco era alla fundaziun Tür auf - mo vinavon ed a tuts sponsurs engraziein nus per ina biala jamna da camp che ha possiblitau a nos giuvenils dalla Cadi da s’entupar e far experientschas nunemblideivlas en ina tiara dil tuttafatg jastra. Las guaflas, ils pommes-frites, ils imposants baghetgs, il lungatg e la cultura pacifica vegnan a restar en buna memoria. Da plinavon entupar persunas ch’enconuschan nossa regiun e nies lungatg colligia: co il mund ei pigns! Prevista: Per tuts giuvenils dalla Cadi e Breil dallas 5. – 8. classas organisein nus per las proximas vacanzas d’atun 2020 puspei in camp a München. Sut campcadi. ch san ins gia ussa reservar in plaz.
Per il team Camp Cadi, Gion Tenner