News-Details

L’emprova generala

02.02.2018

(anr/gv) Dil 2010 – dalla emprema ediziun dalla Trofea Péz Ault – ein las rutas da Caischavedra al Péz Ault vegnidas modificadas pliras gadas. Igl onn vargau han ellas corrispundiu allas pretensiuns dalla Federaziun internaziunala da turas da skis. Quei ha motivau ils organisaturs cun Leo Condrau alla testa da candidar per ina cuorsa dil Cup mundial igl onn 2019. « Nus essan semtgai», ha Condrau saviu communicar dacuort ad ina scuntrada culs voluntaris a Caischavedra. En cuort decida la federaziun dalla surdada. La proxima Trofea Péz Ault ha liug ils 18 da mars. Las preparativas ein gia avanzadas. «Culla situaziun da neiv da quest onn duess quei daventar ina buna caussa», ha Giochen Bearth manegiau. El tgamuna il comite da cuorsa e semtga las rutas. La ruta Verclisa ei biebein 14 kilometers e dumbra 1658 meters differenza d’altezia. Ella meina da Caischavedra al pei dil Péz Ault. La ruta «Gendusas» sedrezza ad amaturs da turas da skis e meina da Caischavedra a Lai Alv, silla distanza dad 8,1 kilometers e 734 meters differenza d’altezia.
La Trofea Péz Ault 2018 ei ina da 22 cuorsas dil Swiss Cup e part dalla seria da cuorsas dalla Svizra orientala. Ella ei medemamein la cuorsa finala dil «Dynafit SAC Yout Cup». Igl onn vargau ei in triep Hollandes separticipaus alla Trofea Péz Ault ella categoria «campiunadi naziunal hollandes». Quei ha caschunau als organisaturs entuorn 40 participonts. «Als Hollandes ha ei plaschiu ed els tschercan era uonn il campiun naziunal da turas da skis a
Mustér», ha Condrau informau.