News-Details

33avla ediziun e per l’emprema gada en colur

02.02.2018

DA HANS HUONDER / ANR

Dapi varga 30 onns cumpara la gasetta da tscheiver «La Sibla» a Mustér ed uonn eis ella en niev vestgiu. Enstagl sin pupi mellen eis ella en colur. Ella fora e zepla sco ils onns vargai, leutier vegnan biaras bunas illustraziuns. Sper il til da tscheiver e la Dertgira nauscha ei «La Sibla» ina dallas grondas attracziuns dil tscheiver a Mustér. Uonn ei la 33avla ediziun cumparida. Naven da damaun sonda sa ella vegnir cumprada ellas stizuns da Mustér e contuorn. Medemamein eis ei pusseivel da retrer ella via iTunes ni Google Play. L’ediziun d’uonn stat danovamein sut il motto: «Siblus fora, dat strihadas, quei meinsvart nuotzun hanadas. Pos ti rir, lu eis mitschaus, cass cuntrari pertuccaus.» 16 paginas pulpidas cun informaziuns, caricaturas ed ina ni l’autra foto dattan in sguard tgei ch’ei succediu igl onn vargau a Mustér, mo era en vischnauncas vischinontas.

Il turissem sut la marella
Dabia da discuorer han il turissem e sia organisaziun tetgala dau igl onn vargau. Quellas discussiuns ein secapescha buca restadas senza in resun ella «Sibla». Aschia constatescha la redacziun che la midada ei la suletta constanza tier Sedrun Mustér Turissem, oravontut quei che pertucca il presidi. Il sulet ch’interessavi la glieud alla radunonza generala digl atun erien las elecziuns, mo quellas hagien muncau sin la gliesta da tractandas. Naturalmein ch’ils gronds projects turistics ad Acla da Fontauna e S. Catrina mauncan medemamein buc ella gasetta da tscheiver. In tema ei era la rumida da neiv en vischnaunca. Siblus constatescha che quei ei ina suletta babilonia. Ina ga dapli han era ils catschadurs fatg furore igl atun e procurau per discussiuns. En quei grau dat ei novitads dalla Val Sumvitg e da Madernal. Lu ha la redacziun era buca survesiu la communicaziun ch’ins cali da producir skis da Zai a Mustér. Il redactur Siblus havevi spargnau daners per saver cumprar in tal model da skis,
mo suenter che la producziun vegni serrada a Mustér vegni el a stuer impunder ils daners per la taglia, damai ch’il pei da quella savessi vegnir alzaus sin 150 pertschien pervia dil Center da sport e cultura. Per novitads procuran era las pendicularas che han acquistau il hotel Sax.
Leu sappien ins empustar egl avegnir pommes senza stuer declarar quei culs mauns.

Dalla politica ed universitads
Sin la corna pren «La Sibla» denton buca mo ils organs turistics ed ils projects novs, mobein era ils exponents dalla politica. Aschia san ins leger ella gasetta in’emprema bilanza davart igl engaschament dalla suprastonza communala nova. Novitads dat ei era dall’emprema e probablamein la davosa universitad a Mustér. Il destin da quella muossi che gnanc la mafia sappi surviver si cheu. Il plaz-scola a Cons vegn tematisaus aschibein sco ils novs ustiers a Fontanivas. Ei seigi da sperar che quels tegnien ora pli ditg a Mustér ch’ils ustiers dil Sax ed il menader dil Center da sport e cultura. E lu mauncan naturalmein era buc entginas episodas persunalas. Nuot’emblidau ha Siblus denton era schabetgs en vischnauncas vischinontas. Per exempel rapporta el da Trun. Leu seigi vegniu organisau igl october ina gronda fiasta e per ina sera hagi Trun giu il dubel habitontas e habitonts. La damonda seigi ussa mo aunc schebein quei plaidi per ni encunter Trun. Mo era dils mieds da massa sa la redacziun rapportar mintg’onn. Aschia ha Siblus constatau ch’ei dat ina nova tendenza da convivenza tiel Radio Romonsch. Las novitads entscheivan ussa numnadamein adina cun salidar il collega. Apropos salidar: Ussa san ins en Puntreis era daco ch’in vischin prominent da Mustér ha schau il gentar tut agradgiu dacuort. El hagi stuiu serender immediatamein a Tavau per beneventar leu il president american. «La Sibla» munchenta denton era buca da rapportar dalla viafier, dalla formula 1 o la Stalusa ni era dil tunnel a Mompé Medel, da Recal e dil crap dalla Val Russein sco era dalla zona d’industria a Pignola e la nova maschina da far glatsch.