News-Details

Da niev era mezs ed entirs dis

06.02.2018

DA HANS HUONDER / ANR

La Canorta d’affons pigns Lumpazi a Mustér porscha egl avegnir era plazs per affons da famiglias che fan vacanzas ella regiun. Cun quei sesiara ina munconza ella purschida turistica sisum la Surselva. La canorta d’affons pigns che sesanfla en localitads dall’anteriura Stampa Romontscha a Mustér ed uss en possess dalla Casatec SA ei occupada bein il mument. Dapresent vegn il survetsch nezegiaus da 44 affons ord l’entira Cadi e quei duront in entochen tschun dis per jamna. Malgrad quella buna occupaziun vegn la purschida extendida ussa tenor il motto: «Flexibilitad ed innovaziun ein da gronda muntada.»

Era per jasters
Sco quei che la responsabla pil menaschi, Lisa Giorgio, di ei il menaschi adina puspei
vegnius confruntaus cun la damonda da famiglias dad jasters, schebein ellas savessien dar lur affons pigns en survigilonza per in miez ni in singul di: «Sin fundament da quellas damondas havein nus decidiu d’introducir in tal survetsch. Nus lein denton era porscher quella caschun als indigens.» Tgi che vul far diever da quei survetsch sa acquistar in bon ed entochen il di avon allas 14.00 san els annunziar lur affons. «Damai che nus havein in contingent savein nus buca prender mintga di il medem diember d’affons supplementar. Per quei motiv eis ei pusseivel ch’in miez ni entir di ei lu gia occupaus cumpleinamein», di Giorgio. Dapresent ei la canorta lundervi da scaffir in program electronic che lubescha lu alla glieud da far las reservaziuns directamein via internet. A moda fetg sempla duei in e scadin haver investa cons plazs ch’ein mintgamai aunc libers. Sper la menadra ein treis persunas scoladas engaschadas ella canorta, leutier ina gidontra e treis emprendistas. Dapi sia fundaziun sesanfla la canorta en localitads dall’anteriura Stampa Romontscha, pli tard Somedia, sut la staziun dalla viafier a Mustér. Quei baghetg ei vegnius acquistaus la fin digl onn vargau dall’interpresa Casatec SA. Tenor Giorgio vegn la canorta denton a restar leu era egl avegnir. Ins hagi il consentiment dil possessur niev. Las localitads ella secunda alzada ein fetg spaziusas e cheutras ordvart adattadas per in tal survetsch.

Dapi 2013

La historia dalla Canorta d’affons Lumpazi ha entschiet igl onn 2011. Lu ei la fundaziun «Tür auf – mo vinavon» numnadamein vegnida dumandada per dar sustegn alla fundaziun d’ina canorta per affons pigns ella Cadi. Ina gruppa da project ei allura semessa alla lavur e 2013 ha la Canorta Lumpazi gia saviu arver sias portas en localitads digl anteriur baghetg dalla stampa. Treis persunas dil fatg han entschiet leu cun la lavur da tgira e survigilonza dils affons. Gia in onn pli tard ei la purschida dalla canorta vegnida cumpletada cun ina plazza da giugs. Igl onn 2015 ha la vischnaunca da Mustér allura dau alla Canorta Lumpazi l’incumbensa da porscher structuras dil di per affons da scoletta e scola. L’instituziun ha surpriu quei pensum e tgira dapi igl onn da scola 2015/16 affons da scola e scoletta. Il medem onn ha la canorta scaffiu l’emprema plazza d’emprendissadi. Avon rodund dus onns ha il menaschi allura engrondiu siu spazi. Ils affons ellas structuras dil di han obteniu in’atgna stanza. Leutier ein ulteriuras localitads per biro, stanza da sesida e pausa pil persunal vegnidas. En quei temps ei il stab da collaboraturas carschius sin siat. La stad vargada han duas giuvnas entschiet lur emprendissadi ella canorta, aschia che quella instruescha il mument treis emprendistas.