News-Details

Via d'untgida ei puspei in tema

26.02.2018

Da Hans Huonder / anr

El contuorn d’Acla da Fontauna a Mustér vegn baghegiau mordio il mument. Ils baghetgs novs cun rodund 1000 letgs vegnan era a caschunar dapli traffic. Alla seduta dil cussegl da vischnaunca il venderdis sera ha gerau Iso Mazzetta menziunau en quei connex era ina eventuala via d’untgida. Ina tala via el sid da Mustér ei gia stada en discussiun avon rodund 30 onns, mo ei lu vegnida strihada ord la planisaziun locala. Sin fundament dil svilup ad Acla da Fontauna eis ella ussa puspei in tema concret. Il venderdis sera ha il cussegl da vischnaunca acceptau unanimamein in postulat da Wendelin Jacomet. Quel pretenda mesiras pil traffic, respectivamein la segirtad ad Acla da Fontauna. Persuenter fa el differentas propostas, denter auter ina rundella. En in’emprema reacziun dalla suprastonza communala sin quei postulat ha Mazzetta puntuau: «Cun ina rundella ei il problem ad Acla da Fontauna buca sligiaus cumpleinamein. Il traffic resta tonaton leu. Per quei motiv fa ei da basegns da scaffir in concept da traffic pigl entir intschess dil vitg.» Concretamein ha el plidau d’ina via d’untgida. «Ina tala ei denton in project d’ina generaziun. Sch’il vitg crescha vinavon drova ei denton ina buna soluziun a liunga vesta.» Emprems discuors cun las instanzas cantunalas han gia giu liug.


«Run­del­la per­su­la sli­gia buc il pro­blem dil traf­fic»

Il cus­segl da visch­naun­ca da Mus­tér ei se­fat­schen­taus il ven­der­dis se­ra d’in tschup­pel fat­schen­tas
El center dallas tractandas dalla seduta dil cussegl da vischnaunca da Mustér il venderdis sera ein plirs postulats stai. Dus ha la suprastonza communala rispundiu a scret, tier in’ulteriur – quel pertuccont soluziuns pil traffic ad Acla da Fontauna – ha ella dau in’emprema informaziun. Quei postulat ha cusseglier Wendelin Jacomet annunziau alla seduta da miez november. El ei vegnius suttascrets da nov ulteriurs commembers dil parlament. Il venderdis sera ei il postulat vegnius approbaus unanimamein dil cussegl ed aschia surdaus alla suprastonza communala. La finamira dil postulat ei da procurar per dapli segirtad pil traffic ad Acla da Fontauna suenter ch’ils baghetgs novs da resort e hotel ein realisai. En special setracta ei dalla segirtad da pedunzas e pedunzs. Persuenter propona Jacomet la realisaziun d’ina rundella ed in sutpassadi pils pedunzs sco era ina soluziun dil traffic en connex cun la staziun dalla Viafier Matterhorn Gottard ed il bus local. Tenor Jacomet ei la caschun da sligiar il problem dada ussa sin fundament dils projects en construcziun ni sin rucca.
Traffic resta el vitg


Gerau Iso Mazzetta ha priu posiziun sil postulat e presentau in’emprema vesta dalla suprastonza communala sin la problematica che pertucca il traffic. «Cun ina rundella ed autras mesiras sligiein nus buc il problem dil traffic. Quel resta.» La suprastonza communala hagi gia fatg empremas sondaziuns concernent ina rundella ed autras mesiras ad Acla da Fontauna. Ina rundella persula caschunassi cuosts approximativs da 2,2 milliuns francs. Denter auter fussi ei necessari d’adattar la punt per contonscher il diameter da rodund 36 meters per ina rundella. «Il cantun ei buca promts da separticipar vid il project. El ei promts da sustener la soluziun cun ina cumpart vid ils cuosts ch’el havess aschia ni aschia per sanar in mument la via cantunala en quei liug», di Mazzetta. Malgrad che la suprastonza communala ha in’empau autra vesta sin la situaziun ad Acla da Fontauna puntuescha el: «Prioritad en quei liug han ils pedunzs, lu il traffic public e la finfinala il traffic individual.» La suprastonza communala va d’accord ch’ei drova mesiras el liug.


Ina via d’untgida
Enstagl da seconcentrar spirontamein sil problem dil traffic ad Acla da Fontauna ei la suprastonza communala dil meini ch’ei seigi da tener en egl il traffic egl entir vitg: «Sche nus fagein nuot meina igl entir traffic per Acla da Fontauna, mo era pils pass Lucmagn ed Alpsu, era egl avegnir atras il vitg.» Per quei motiv propona la suprastonza communala da sligiar il problem sin fundament d’in concept. Part da quel duei era ina via d’untgida pil vitg da Mustér esser. Ina tala ei gia stada in tema concret ils onns 1980 e 1990. Ins ha lu denton schau curdar quella culs onns el rom dalla planisaziun locala. Oriundamein era ina via el sid da Mustér previda. Ella havess menau naven da dado il vitg sur Salaplauna/Rieven ad Acla da Fontauna/Sax. Leu havess ella menau ella via cantunala enviers Sedrun. Sin fundament dil svilup da baghegiar – oravontut ad Acla da Fontauna – mo lu era dil Pass dil Lucmagn ch’ei aviarts dapi onns era igl unviern e che vegn migliuraus ils proxims onns, sedat ina nova situaziun. «Sche nus cumparegliein quella situaziun cun auters loghens sche setracta ei en quei connex d’in project d’ina generaziun», di Mazzetta. Sco quei ch’el ha detg il venderdis sera ella seduta dil cussegl da vischnaunca ein emprems contacts cun las instanzas cantunalas gia vegni empusti. El senn dallas explicaziuns fatgas vegn la suprastonza communala a rispunder il postulat da Wendelin Jacomet.


Niev auto-cistiarna
La suprastonza communala ha rispundiu il venderdis sera dus ulteriurs postulats: Scaffir novas plazzas el subcenter Mustér, respectivamein instradar ina discussiun davart las structuras politicas. Ils postulants Rita Huonder-Tenner ed Edgar Durschei ein stai cuntents cun las rispostas. Il cussegl da vischnaunca da Mustér ha plinavon approbau unanimamein la cumpart dalla vischnaunca da Mustér vid la cumpra d’in niev auto-cistiarna pils Pumpiers Sursassiala. Gia concediu lur credits vid l’investiziun havevan las vischnauncas da Tujetsch e Medel. Il vehichel niev ei calculaus cun cuosts da 450 000 francs. L’Assicuranza da baghetgs dil cantun Grischun surpren 27,5 pertschien dall’investiziun. Aschia resta ina summa da rodund 326 000 francs per las treis vischnauncas pertuccadas. Da quella summa surprendan Mustér rodund 177 000 francs, Tujetsch biebein 117 000 francs e la vischnaunca da Medel 32 000 francs. Il medem mument ha il cussegl denton era incaricau la suprastonza communala da contactar las vischnauncas vischinontas e surluvrar ils statuts pils Pumpiers Sursassiala. Plirs cussegliers ein s’exprimi criticamein enviers la clav da repartiziun dils cuosts, oravontut dallas investiziuns. Medemamein ha il parlament communal approbau il venderdis sera la lescha davart l’indemnisaziun dallas prestaziuns dalla vischnaunca en connex cul provediment d’electricitad.