News-Details

Visetas ord l’Africa e China el Gimnasi claustral a Mustér

07.03.2018

DA PAUL DUFF / ANR


Igl ei dumengia, puntualmein allas 17.11, il tren da Cuera–Mustér sefermaalla staziun finala. El marighel da giuvnas e giuvens che spetgan l’arrivada vegn moviment e prest san ins pertgei. Ord il carr dalla Viafier retica descenda ina delegaziun da students. Lur cumparsa relata ch’els vegnan dil sid, ils biars dad els ord l’Africa. Il beinvegni cun quels che spetgan ei cordials ed ins percorscha ch’entginas ed entgins s’enconuschan gia. Pliras studentas e plirs students dil gimnasi da Mustér ein sezs stai el sid dall’Africa e passentau leu enzacontas jamnas tier quels ch’ein ussa vegni tier els.

Valetas restontas per ils giuvenils

In mat giuven, il pign dils presents, stat plitost dalla vart. El ei vestgius cun in lev jachet ed igl ei veseivel ch’el schela. Igl ei Angelo ch’ha astgau far il viadi a Mustér gia cun quitordisch onns. El vegn dall’insla Maurizius e ses patratgs ein aunc leu e segiramein era il giavisch ha el ch’el savessi esser a casia, pertgei leu eis ei ussa 35 grads cauld. El ha viu l’emprema gada neiv e palpa quella cun respect e marveglia. «A Maurizius tschintschein nus creol. Nus emprendin denton era franzos ed engles.» Ils proxims quendisch dis retscheiva el tetg ed ambient dalla studenta Anna tier la famiglia Manetsch a Campliun. Era ils ulteriurs visitaders san ir tier ina famiglia d’in student ni studenta a Mustér ni ella vischinonza. Sco Angelo ha bein mintgin dils visitaders sia historia persunala, la quala vegn ils proxims dis enrihida cun novas experientschas, relaziuns ed impressiuns. Ei vegn ad esser reminiscenzas restontas en lur veta futura.

Swiss Eduglobe possibilitescha ils brats internaziunals

Possibilitau il brat ha la firma colligiada cun la claustra da Mustér «Swiss Eduglobe».
Ursin Defuns ei il cau da quella e sefatschenta dapi gleiti dus onns cun las relaziuns
internaziunalas dil gimnasi claustral. Enconuschent ei che students dalla China van a scola el gimnasi. La Swiss Eduglobe ha per finamira dad intensivar las relaziuns internaziunalas e cheutras augmentar il diember da scolars ord tiaras jastras che frequenten la renomada scola media. Purschi vegnan differents projects da studi dil praticum d’emprender lungatgs tochen tier la scolaziun sur plirs onns cun matura. Specialmein intensivs contacts ein empusti cun la China, l’Africa dil sid e Namibia. Ord quellas tiaras vegnan ils students ch’ein arrivai la dumengia vargada. Quater dad els ein dall’Africa dil sid, tschun vegnan da Namibia, quater dalla China ed il giuven Angelo da Maurizius. «Nus havein preparau per els in program intensiv. Els san separticipar allas lecziuns da scola, surtut vegnan els integrai el chor claustral che dat proximamein plirs concerts.» Aschia lai Defuns dar in’egliada egl urari da sias visetas. «Las notas da cant han ils students survegniu cun posta electronica ed han aschia saviu emprender las canzuns a casa.» Defuns ha organisau tut el detagl. Cun ils dus umens Dirk Jonkheer e Hans Peter Marc ha Swiss Eduglobe duas persunas da contact ell’Africa dil sid. Els procuran per buns ligioms e relaziuns tier las scolas aultas dalla republica. Sil mund internaziunal gaudan la scolaziun ed educaziun dalla Svizra in fetg bien num. Plinavon rangheschan las universitads da nossa tiara denter las meglieras scolas internaziunalas. Talas valetas ston vegnir derasadas el mund global. Cheutras sa la scola claustrala recrutar students digl exteriur. Il bien num ha igl institut educativ
gia dapi biars onns contonschiu cun sia scolaziun ed educaziun cun valetas dad etica cristiana.