News-Details

Cash flow da 2,5 milliuns francs

11.04.2018

(anr/hh) Il quen dalla vischnaunca da Mustér pigl onn 2017 siara cun ina sviulta 15,4 milliuns francs ed in gudogn da 450 000 francs. Il cash flow munta a 2,5 milliuns francs.                         Cuntenidas ellas expensas ein  amortisaziuns totalas dad 1,86 mil liuns francs. Il quen d’investiziun siara cun cuosts da 3,88 milliuns ed entradas dad 1,35 milliuns francs. Cheutras sedattan investiziuns nettas da 2,5 milliuns francs. Sco quei che la suprastonzacommunala scriva el messadi per mauns dil parlament communal che tracta il quen proximamein pertuccan las pli grondas investiziuns il Center da sport e cultura cun 478 000 francs, vias ed illuminaziun cun 490 000 francs sco era la construcziun da canalisaziuns ed il rempar en Val Acletta cun bunamein dus milliuns francs.

Investiziuns futuras

«Nus astgein senz’auter plidar d’in bien quen communal 2017, stuein denton era veser che dabia investiziuns previdas igl onn 2017 han buca saviu vegnir fatgas. Pliras amortisaziuns ch’eran previdas han, damai ch’il quen ha buca saviu vegnir serraus giu sco previu el decuors digl onn, buca saviu vegnir fatgas», constatescha la suprastonza communala el messadi. Il bien quen evocheschi spert giavischs per novas investiziuns ni per ina reducziun dil pei da taglia: «Ils proxims onns ein grondas investiziuns sin rucca, seigi la sanaziun ed engrondaziun dil Center da sport e cultura, la sanaziun dalla serenera, la via d’uaul dil Run sco era la sanaziun dalla casa da scola. Plinavon han dabia vias communalas ed autra infrastructura communala grond basegns d’ina sanaziun.»

Projects ein d’avantatg
Duessien tuts projects turistics vegnir realisai sco previu (Catrina Resort, niev hotel Acla da Fontauna e colligiaziun dils territoris da skis Mustér–Tujetsch–Andermatt), astgi la vischnaunca quintar cun in augment dallas entradas el futur: «Las investiziuns dils proxims onns vegnan ad esser decisivas per la situaziun finanziala dalla vischnaunca per la proxima generaziun. Bunas investiziuns en buns projects e bien manteniment dall’infrastructura communala mantegnan e scaffeschan plazzas da lavur e genereschan
dapli entradas tier l’economia sco era tier il maun public.» Il quen dalla vischnaunca pigl onn 2017 vegn tractaus dil cussegl da vischnaunca alla proxima seduta che ha liug ils 20 d’avrel 2018.