News-Details

«Mustér drova letgs ella hotellaria»

12.04.2018

DA HANS HUONDER / ANR

La lescha federala davart las secundas habitaziuns possibilitescha sut circumstanzias da midar ina part d’in hotel existent en secundas habitaziuns. La suprastonza communala da Mustér vul pli u meins exclauder quei sin intschess dalla vischnaunca. L’entschatta mars 2018 ha la suprastonza communala lantschau ina procedura da cooperaziun denter auter concernent l’applicaziun dalla lescha davart las secundas habitaziuns en vischnaunca. Per quei intent ha ella scaffiu in sboz per in’atgna lescha cun treis artechels. Ferton che la lescha federala possibilitescha ina midada da maximalmein 50 pertschien d’ina part dalla surfatscha d’alloschament d’in hotel en habitaziuns secundaras, exclauda la lescha communala ina tala midada. In’excepziun ei pusseivla sulettamein sin fundament d’in plan d’utilisaziun per diever special. In tal plan stuess lu vegnir approbaus dil pievel.


Clars criteris
La midada d’ina part da maximalmein 50 pertschien dalla surfatscha d’alloschament
d’in hotel en habitaziuns secundaras tenor lescha federala ei colligiada cun in tschuppel criteris. Aschia ston las suandontas premissas vegnir ademplidas: Il menaschi existeva gia avon ils 11 da mars 2012 ed esser vegnius menaus duront 25 onns. Il possessur sto dar la cumprova che quel sappi buca vegnir menaus a moda rentabla egl avegnir e ch’il menaschi sappi buca vegnir midaus en habitaziuns administradas. La nunrentabilitad dil menaschi astga buca sebasar sin in secuntener falliu dil meinafatschenta. Plinavon ch’ei dat negins interess surordinai en connex cun ina midada d’utilisaziun. Per ch’ina tala midada parziala en secundas habitaziuns seigi insumma pusseivla drova ei era in pareri d’in expert independent. La via restrictiva che la suprastonza communala ha eligiu e ch’ella presenta per mauns dalla proxima seduta dil cussegl da vischnaunca argumentescha il president communal Robert Cajacob suandontamein: «Nus lein evitar ch’ulteriurs hotels siarien lur portas e fetschien ord lur localitads semplamein habitaziuns sco quei ch’igl ei stau il cass en auters loghens. Mustér drova letgs ella hotellaria, gia ussa havein nus memia paucs. Nies turissem ei dependents dalla hotellaria.»


Mantener la hotellaria
Tenor Cajacob seigi la lescha federala fatga per tuttas vischnauncas, era quellas che seigien buc exnum dependentas d’ina hotellaria, respectivamein d’in turissem.
«Tenor nies sboz eis ei tonaton pusseivel da far in’excepziun. In hotel che sa cumprovar ch’el sto far la midada sa far quei el rom d’in project special», di Cajacob. Semegliontamein argumentescha gerau Iso Mazzetta la proposta dalla cumissiun preparatoria per la planisaziun locala, respectivamein la suprastonza communala: «Sper ils letgs els resorts novs ad Acla da Fontauna e S. Catrina duvrein nus era egl avegnir letgs en hotels. Senza quei potenzial vegnin nus buca da mantener nossa infrastructura turistica.» Per Mazzetta astgi la pusseivladad da far la midada parziala d’hotels en habitaziuns secundaras buca semplamein vegnir survida sin in tablet: «Pliras autras vischnauncas turisticas el cantun Grischun vegnan ad ir la medema via sco nus.»

UCP ei buca cuntenza
La suprastonza dall’Uniun da commerci e professiun Mustér ha priu posiziun sil sboz presentau dalla suprastonza communala. Biebein in tozzel commembras e commembers dall’uniun sustegnan medemamein quell’intervenziun. Pil president dall’UCP, Edgar Durschei, eis ei clar: «Per in hotel che sto ir la via da midar si’utilisaziun, per exempel en ina part cun secundas habitaziuns, dat ei negin avegnir pli ella hotellaria ed era negin cumprader. Ins spendra negin menaschi cun esser pli restrictivs che la lescha federala da secundas habitaziuns.» La lescha sco presentada ussa dallas autoritads seigi mo da disavantatg: «Ils criteris che ston vegnir adempli per saver nezegiar quels 50 pertschien en fuorma da secundas habitaziuns ein gia fetg restrictivs. Quei ei buca pusseivel mo aschia.» El sedamonda sch’ei drovi insumma ina lescha communala per quei intent: «Sch’in hotel sa buca midar siu nez daventa el eventualmein ina ruina. Quei sa secapescha era buc esser el senn dalla vischnaunca.» Il sboz per la lescha da secundas
habitaziuns communala vegn tractaus dil cussegl da vischnaunca ils 20 d’avrel 2018.