News-Details

«Fontanivas ei in paradis»

03.05.2018

DA HANS HUONDER / ANR

Avon rodund in’jamna ei il campadi dil TCS a Mustér partius ella stagiun nova e cun el ils novs menaders Tom e Kate Zweidler. Els selegran sin lur nova occupaziun ed ein semtgai per lur emprema stad. Igl atun vargau ei l’èra d’engaschament dallas soras Renata Gadola e Brida Muscas al campadi dil TCS a Mustér/Fontanivas ida a fin suenter 16 onns. Parallelmein cun lur abdicaziun ha il TCS tschercau ina nova direcziun pil menaschi. «Nus essan vegni fatgs attents pli u meins casualmein sin quella plazza ed essan s’annunziai. Avon havein nus visitau il campadi e constatau ch’el fuss in’interessanta sfida professiunala», di Tom Zweidler. Ensemen cun sia consorta Kate ha el seschau pladir per la plazza da meinafatschenta.


Da Tavau a Mustér
Tom Zweidler ei carschius si a Tavau. Leu ha el buca mo passentau si’affonza e giuventetgna, mobein era fatg igl emprendissadi da cuschinier. Suenter quel eis el staus engaschaus ella clamada en differents loghens. La finfinala ha el decidiu da surprender il campadi Rinerlodge a Tavau. Quel ha el menau ils davos diesch onns. La consorta Kate ha fatg in studi sil sectur dalla sanadad ed ha luvrau silsuenter en differentas funcziuns ella gastronomia e hotellaria. Pil menaschi dil restaurant a Fontanivas ch’els han aviert avon diesch dis ei vegniu fundau ina societad cun responsabladad limitada. Ferton che Tom Zweidler vegn ad esser responsabels leu pil restaurant e la cuschina vegn Kate Zweidler a luvrar pil campadi sco tal, vul dir reservaziuns entochen recepziun.

Natira e ruaus
«Quei ei in paradis. Quei ei stau noss’emprema impressiun da Fontanivas», di Tom Zweidler. Els sappien luvrar cheu en in contuorn da ruaus e bia natira: «Fontanivas porscha buca mo la caschun da far vacanzas e ruassar, mobein era bia pusseivladads da divertiment pils affons. Leutier s’audan segiramein las pusseivladads en ed entuorn il lag ed il Rein. Cheu ei tut empau special.» In avantatg pil menaschi seigi il lag sco liug da sentupada public, pia da hosps da vacanzas ed indigens. Ina buna impressiun han Tom e Kate Zweidler denton era dall’infrastructura cun baghetgs e plazs per rullottas e tendas: «Tut ei structurau bein. Ei dat plazs ell’umbriva e per tgi che vul era el sulegl.» Sin la damonda, tgei ch’els intendien tonaton da midar cun lur engaschament, di Tom Zweidler: «Nus menein vinavon il menaschi questa stad sco entochen dacheu. Tut priu essan nus dil meini che quel seigi secumprovaus. Tonaton vegnin nus denton a veser schebein ei fa da basegns da far in’adattaziun ni l’autra en vesta alla proxima stagiun.»

Products dalla regiun
El menaschi d’ustria vul il cuschinier nezegiar aschi biars products dalla regiun sco pusseivel: «La carta cuntegn spisas cumprovadas per la clientella, mo lu era entginas novaziuns. Denter quellas bizochels ord la cazzetta ni capuns. En mintga cass vegnan tuttas spisas preparadas cun products frestgs.» Il menaschi ch’ei aviarts permanentamein entochen ils 23 da settember 2018 occupa treis persunas en plazza cumpleina sco era treis persunas cun pensum parzial. Leutier vegn ina ni l’autra gidontra e gidonter il temps dalla stagiun aulta il fenadur ed uost. Sper la grond’ustria cun plaz endadens ed ordadora porscha il campadi dil TCS a Fontanivas 120 plazs per rullottas e rodund 60 per tendas. Tenor Kate Zweidler ein gia dabia reservaziuns per la stagiun vegnenta arrivadas. En lur emprema stagiun da menaschi san Tom e Kate Zweidler quintar cun sustegn dils anteriurs menaders dil campadi: «Nus essan vegni retschevi fetg cordial cheu a Fontanivas.» Ils 12 da matg 2018 porschan els in aperitiv da beinvegni dallas 14.00 entochen allas 17.00. In e scadin ei envidaus a quel.