News-Details

UCP Mustér - 74 fatschentas ein s’annunziadas per l’EX18

09.05.2018

UCP Mustér: grond’activitad

DA HANS HUONDER / ANR

El center dall’activitad dall’Uniun da commerci e professiun Mustér stat quest onn l’EX18. Ella sespleiga dils
26 entochen ils 28 d’october 2018. Sco quei che la copresidenta Rita Huonder ha saviu orientar las commembras ed ils commembers dall’UCP alla radunonza generala la sonda sera, han 74 interpresas annunziau definitivamein lur participaziun. Sper la part commerciala vegn l’EX danovamein cumpletada
cun entginas attracziuns. Il president dall’uniun, Edgar Durschei, ha saviu presentar in tschuppel
projects instradai e realisai igl onn passau. La suprastonza ha scaffiu differents mieds da propaganda per
Mustér. Plinavon ei vegniu ediu in magazin cun bia informaziuns davart il commerci indigen.La secunda
ediziun da quel duei cumparar la primavera 2019. La radunonza generala ei era vegnida orientada davart las activitads e finamiras dalla Cuminonza dils possessurs da secundas habitaziuns da Mustér.

74 fatschentas ein s’annunziadas per l’EX18
L’Uniun da commerci e professiun Mustér edescha in secund magazin davart il commerci indigen

En struschamein sis meins ha liug l’EX18. Entochen ussa han 74 fatschentas annunziau lur participaziun. Medemamein ei il program da rama ton sco fixaus. Alla radunonza generala dall’Uniun da commerci e professiun Mustér la sonda sera el hotel Cucagna ei buca mo vegniu orientau davart l’EX18, mobein era decidiu d’edir in secund magazin davart il commerci da Mustér igl onn 2019. Igl onn 2017 ha l’UCP sviluppau ina remarcabla activitad. Sut il presidi d’Edgar Durschei ein differents projects vegni lantschai e realisai. Aschia ha ei giu num reglar il tgamun dil comite d’organisaziun dall’EX18. Ellas persunas da Rita Huonder e Corinne Staub eis ei reussiu da cattar in copresidi. L’uniun ha scaffiu ina tastga per far cumissiuns ed ina vacca da plesch, in souvenir per hosps da vacanzas. Miez fevrer ei igl emprem magazin dall’uniun cumparius. La finamira da quel ei da far las intepresas da Mustér e contuorn pli enconuschentas, oravontut era tiels possessurs da secundas habitaziuns e lur hosps. La suprastonza ha plidentau in tschuppel fatschentas ch’eran aunc buca commembras dall’uniun. Quell’acziun ei stada encorunada da success, 11 ein sedecididas d’entrar ell’uniun. Ella persuna da gerau Iso Mazzetta eis ei reussiu d’occupar danovamein in sez ella suprastonza da Sedrun Mustér Turissem suenter che Giusep Columberg ha bandunau quella suenter in grond engaschament
duront diesch onns. La suprastonza dall’UCP ha priu posiziun tier la lescha communala da secundas habitaziuns e ha organisau sentupadas cun la suprastonza communala. Medemamein ha ella fundau ina gruppa da lavur che fa patratgs davart Mustér, en special co far il liug pli attractivs.

Amiez las preparativas dall’EX18


74 fatschentas ein s’annunziadas definitivamein per la participaziun all’EX18 che ha liug dils 26 entochen ils 28 d’october 2018 el Center da sport e cultura. Pils arranschaments specials vegn endrizzau ina tenda. Ina fiasta d’october ed in festival da food ein las attracziuns principalas supplementaras da quels treis dis. Il di dall’avertura ha era liug el Center da sport e cultura il Forum Surselva e la sonda la premiera dil film romontsch «Amur senza fin». Cumpletaus vegn il program da rama cun divertiment ed in survetsch divin la dumengia cun avat Vigeli Monn. Ina purschida speciala dall’organisaziun ei la concurrenza davart innovaziun, invenziun ni realisaziun per glieud giuvna. Per quella eis ei pusseivel da s’annunziar entochen la fin da zercladur tiel Center da formaziun Surselva ni il Gimnasi dalla claustra a Mustér. Ils projects han da vegnir inoltrai entochen ils 20 da settember 2018.

Secunda ediziun dil magazin

Il magazin che l’Uniun da commerci e professiun Mustér ha ediu e repartiu miez fevrer da quest onn ha cattau buns resuns. Rodund 50 interpresas han propagau lur purschida en quel, leutier eis el vegnius cumpletaus cun informaziuns generalas davart la vischnaunca e sia purschida. La primavera 2019 duei la secunda ediziun da quei magazin cumparer. Sco responsabel persuenter ha la radunonza generala eligiu Hans Huonder ch’ei gia staus engaschaus vid l’emprema ediziun. La suprastonza fa plinavon patratgs concernent ina purschida speciala ils 16 da december 2018. Tenor Fredy Caminada vegn persequitau l’idea d’ina vendita communala
cun purschida speciala ed attracziuns. Medemamein vegn tschercau in num per la vacca da plesch. La victura ni il victur da quella concurrenza, sco era il num eligiu, duein vegnir presentai all’EX18. Ord il ravugl dalla radunonza ei vegniu la proposta da far ponderaziuns da tener aviert igl avegnir las stizuns pli ditg. Il Resort Catrina ed il niev hotel ad Acla da Fontauna portien ulteriurs hosps e cheutras seigi ei indicau da far patratgs era davart ils temps d’avertura dallas stizuns sco igl il cass en auters loghens. Andrea Hosang ei vegnida eligida sco nova actuara dall’uniun. Ella remplazza Adrian Deflorin ch’ei setratgs suenter esser staus diesch onns en suprastonza.

Bia laud per l’UCP


Il president communal Robert Cajacob ha purtau ils salids dalla suprastonza communala ed accentuau l’impurtonza dall’Uniun da commerci e professiun Mustér. La grond’activitad actuala da quella fetschi grond plascher. Alla fin dalla radunonza generala ha Christian Peyer presentau las ideas, ils giavischs e las aspectativas dalla Cuminonza dils possessurs da secundas habitaziuns da Mustér che dumbra 260 commembras e commembers. El center da lur giavischs e basegns stetti il dialog permanent cun las instanzas politicas, pendicularas, Sedrun Mustér Turissem ed il commerci. Mustér dispona da rodund 1100 habitaziuns secundaras. Tenor ina calculaziun genereschan ellas ina plivalur annuala da 27,5 milliuns francs.