News-Details

Di da giugs per pign e grond

07.06.2018

DA HANS HUONDER / ANR

Igl onn vargau ha la Ludoteca Mustér e contuorn saviu festivar il giubileum da
20 onns. En connex cun quei giubileum ha ella era instradau in project cun la scola. Scolaras e scolars han empriu d’encouscher ina partida giugs. Venderdis s’entaupan ils scolars ad in di da giugs, sonda vegn quel arranschaus per la scola e per la publicitad.
Igl onn 1997 ha ina gruppa da dunnas fundau la Ludoteca Mustér ed endrizzau sia emprema purschida ell’anteriura Casa Capeder amiez il vitg. Paucs onns pli tard ha il menaschi retratg localitads el plaunterren dalla halla Cons e dapi rodund 15 onns ei siu survetsch d’anflar en ina stanza spaziusa e surveseivla ell’emprema alzada dalla
halla Cons. En quels ver 20 onns d’existenza ha ella buca mo midau duas ga casa, mobein ha era giu in svilup ed augment da sia purschida. Il diember da medias che stat a disposizun alla clientella ei s’augmentaus dall’entschatta da 250 mieds sin rodund 1200 che vegnan actualisai e cumpletai mintg’onn danovamein. Il team dalla Ludoteca Mustér porscha alla clientella giugs da famiglia, d’emprender, da rollas, da construcziun, da schonglar ni era giugs gronds, chistas da giugs e surtut
era giugs romontschs. Plinavon offerescha la ludoteca termagls, videos, dvd’s, giugs
electronics e vehichels per affons pigns. Il team dalla ludoteca organisescha da temps
en temps occurrenzas specialas sco seras e dis da giug. Regularmein separticipescha
ella era ad arranschaments el vitg, sco per exempel la fiera da s. Martin. Pil grond engaschament en favur dalla publicitad ha la Ludoteca Mustér e contuorn obteniu igl onn 2007 il Premi Desertina da promoziun dalla vischnaunca da Mustér. Igl ei aschidadir stau in regal pil giubileum da diesch onns.

Project cun las scolas
En connex cul giubileum da 20 onns ha la Ludoteca Mustér e contuorn purschiu in tschuppel arranschaments igl onn vargau. Denter auter ha ella era instradau in project cun las scolas. «Mintga classa dalla scola populara da Mustér ha obteniu plirs giugs igl atun vargau. Els ein vegni eligi tenor la vegliadetgna dils affons. Els han survegniu quels per exercitar e la finfinala per presentar els allas autras classas venderdis proxim», declara Stefania Ritter ch’ei responsabla per quei project davart la ludoteca communablamein cun Catarina Steger e Michel Andriuet. La sonda vegnan ils giugs allura presentai alla publicitad, era quei entras scolaras e scolars. «Nus sperein secapescha che bia glieud anfli la via el Center da sport e cultura. Ensemen cun las scolaras ed ils scolars da Mustér e Medel spitgein nus denter 500 e 600 persunas», di Ritter. Quei grond di da giugs vegn arranschaus ella halla plurivalenta e la halla da tennis, leutier porscha il Center da sport e cultura in’ustria. Sper ils giugs exercitai dallas scolaras e dils scolars presenta la Ludoteca Mustér e contuorn era giugs ed autras
pusseivladads da divertiment. «Nus lein nezegiar quella caschun per presentar la purschida dalla ludoteca alla publicitad», di Ritter. Cun quei di da giugs vegnan ils arranschaments pil giubileum da 20 onns terminai. Quels ein stai frequentai bein. La purschida dalla Ludoteca Mustér e contuorn vegn nezegiada surtut da famiglias cun affons, en special affons pigns:
«Quei ei en emprema lingia famiglias cun affons ella vegliadetgna da quater entochen
siat onns.» Las acziuns da giubileum hagien giu in bien effect sin las frequenzas igl unviern vargau.