News-Details

Il mund dils aviuls a Mustér

12.06.2018

(anr/hh) Duront treis dis dall’jamna vargada han amitgs ed interessents
dall’apicultura giu la caschun da visitar l’exposiziun speciala «Grischa Biena uf da Schiena» alla staziun a Mustér. Ella ei vegnida purschida dall’Uniun d’apiculturs Mustér e contuorn el rom da sias activitads pil giubileum da 100 onns.
L’exposiziun «Grischa Biena uf da Schiena» sesanfla en in carr vegl da viafier. Ella possibilitescha ad affons, mo era als carschi d’emprender d’enconuscher la veta e l’impurtonza dils aviuls. Cheu sa vegnir rimnau biaras informaziuns nizeivlas davart quei animalet che presta in grond survetsch alla natira. L’exposiziun sefatschenta dalla biologia, dil prighel pil stadi dils aviuls sco era dalla producziun da mèl cugl aviul ed igl apicultur el center. Ella porscha plinavon staziuns interactivas nua ch’ils affons san scuvierer il mund dils aviuls en ina fuorma d’aventura.
Fetg motivonta en quei connex ei per exempel ina cruschera. Cun quella emprendan ils affons d’enconuscher in impurtont principi dils aviuls: Els ston brattar ora la savida e gidar in l’auter, cass cuntrari reussescha ei buca da cattar ils plaids dalla soluziun. Cumpletada vegn l’exposiziun cun products dils aviuls, denter quels secapescha era il mèl. Quell’exposiziun davart ils aviuls ei vegnida iniziada dall’Uniun da project dils apiculturs giuvens Flugschnaisa e realisaus dall’interpresa Hof3 GmbH. Igl entir cuntegn dall’exposiziun – en tun sco a scret – ei en tuts treis lungatgs cantunals tudestg, talian e romontsch. Suenter la partenza da quell’exposiziun ambulonta sin rodas igl avrel 2017 a Cuera eis ella stada da veser en plirs loghens grischuns. Igl atun vargau eis ella gia stada sin viadi a Mustér. Il carr da viafier ch’ei vegnius transformaus ell’exposiziun ha dil reminent ina vegliadetgna da rodund 70 onns ed ei vegnius mess a disposiziun dalla Viafier retica. Als treis dis ch’el ei staus l’jamna vargada a Mustér han ils apiculturs saviu beneventar entginas persunas ed aschia derasar interessantas informaziuns davart ils aviuls e l’activitad apistica.