News-Details

Drizzau da niev il muossavia

09.07.2018

DAD ANDREAS CADONAU / ANR

Enteifer las structuras turisticas semuossa niev moviment naven da Mustér entochen Ursera. Dacuort han las interpresas da transport da Sedrun/Andermatt e Mustér annunziau ina nova societad da reclama e stipulau in invit da participaziun allas ulteriuras organisaziuns da marketing activas el medem intschess geografic. La colligiaziun dils territoris da skis denter Ursera sur dus cuolms vi entochen Mustér dat niev stausch enteifer las structuras da marketing egl intschess dallas duas interpresas da transport. En ina communicaziun scrivan las interpresas Arena da skis Andermatt-Sedrun e las pendicularas da Mustér da fundar ina societad da marketing communabla cun la finamira da commercialisar igl intschess da skis, bike, viandar e da vacanzas. Ellas ein dalla opiniun da puder nezegiar aschia meglier il potenzial dil niev intschess colligiaus proximamein entras ils mieds da transport en construcziun. Las duas pendicularas scrivan dad esser aviartas per la participaziun dad ulteriurs partenaris turistics activs el medem intschess turistic. A tgi ch’igl invit sedrezza ei buca stipulau claramein, ei denton tuttina negin misteri. La Val d’Ursera posseda in’atgna organisaziun turistica incaricada da posiziunar la regiun ella fiera turistica. E sisum la Cadi setracta ei da Sedrun Mustér Turissem, in’organisaziun ch’ha surdau la lavur da reclama a Grischun Vacanzas dapi entgins onns. E quella collaboraziun cun Grischun Vacanzas pudess senz’auter esser historia, priu il cass che Sedrun Mustér Turissem (SMT) suonda igl invit dalla nova societad da reclama installada dallas pendicularas. E va ei tenor la veglia dalla presidenta digl SMT, Corinne Staub, pudess quei esser il cass en biebein dus onns. La presidenta digl SMT ha bein concediu che la cunvegna cun Grischun Vacanzas seigi dacuort vegnida prolungida per in onn. Ella beneventa denton l’annunzia dallas duas pendicularas da fundar ina societad da reclama communabla. Ella vesa igl avegnir dad SMT en quella organisaziun ed ei promta da suandar igl invit, quenta denton cun in cert spazi da temps entochen che las decisiuns necessarias da tut ils involvai egl SMT ein sin meisa.

Negin plan davos escha serrada
La decisiun dallas duas interpresas en favur dad ina nova organisaziun da marketing ei buca curdada davos escha serrada. Renato Decurtins, responsabels per la fatschenta turistica enteifer la suprastonza communala dalla vischnaunca da Tujetsch, ha tschintschau da differentas stentas da tut ils involvai da semover ella direcziun annunziada dallas duas interpresas da transport. Il suprastont communal ha medemamein beneventau igl agir dallas pendicularas e tschintschau dad ina decisiun pli sempla davart da duas interpresas privatas. Che la historia digl SMT ei buca gest signada dad ina harmonia cuntinuada ei il suprastont communal dalla vischnaunca tuatschina bein pertscharts. Tonpli ch’igl anteriur meinafatschenta digl SMT, Hans Kaspar Schwarzenbach, ha criticau massiv via ina intervesta, dada il fevrer vargau, igl ambient politic dalla organisaziun turistica, tschintschau da munconza da cuntinuitad e dad events da pauca durabladad. La critica ei bein buca stada tschelada sisum la Cadi. Tonpli paran ils responsabels dad esser promts da caminar la via iniziada dalla duas pendicularas. Che quella via communabla plaida encunter la cunvegna cun Grischun Vacanzas ei era clar per Decurtins. Circa in miez milliun francs stat a disposziun ad SMT per la lavur da reclama e la medema summa impunda l’organisaziun turistica ella Val d’Ursera. Con che las pendicularas ein pomtas d’impunder en l’atgna lavur da reclama vegn a semussar.

Neginas dublettas
Ch’ei detti proximamein dublettas enteifer la lavur da marketing ella regiun da Mustér entochen la Val d’Ursera snega il meinafatschenta dalla Arena da skis Andermatt-Sedrun, Silvio Schmid. El ha fatg attent alla veglia da collaborar ed agl invit da participaziun stipulaus dallas pendicularas viers las organisaziuns existentas. El ha plinavon visau alla autonomia dallas interpresas e per Schmid eis ei era pli sempel per interpesas privatas da decider che per organisaziuns alimentadas cun daners publics. Il meinafatschenta dallas pendicularas Andermatt/Sedrun ha menziunau las grondas investiziuns els dus territoris da skis e dalla pressiun da carmalar ulteriura clientella en quei intschess. Ed el lai negin dubi alla opiniun dallas duas interpresas da sligiar la cunvegna da reclama cun Grischun Vacanzas. Schmid ha denton fatg attent che quei seigi ina decisiun dall’organisaziun turistica dallas duas vischnauncas e che las pendicularas seigien buca involvadas direct en quella decisiun.