News-Details

Cun Forum Surselva ed 80 expositurs

09.07.2018

DA HANS HUONDER / ANR

Per l’emprema ga ha il Forum Surselva liug uonn a Mustér. El vegn arranschaus el Center da sport e cultura il di dall’avertura dall’EX18. L’Uniun da commerci e professiun Mustér organisescha la fin october per l’endischavla ga l’EX. Quella historia da success sco vitrina dalla Cadi – oz ina plattafuorma da sepresentar per l’entira Surselva – ha entschiet igl onn 1986. Empau pli giuvens ei il Forum Surselva, mo quel ha liug uonn gia per la dudischavla ga. Avon dus onns han ils organisaturs decidiu da bandunar la halla da helicopter a Tavanasa e da porscher el alla ILHGA a Glion. «Il medem mument havein nus era decidiu d’arranschar il forum mo pli mintga dus onns, mintgamai all’EX a Mustér ni all’ILHGA», di il president dil comite d’organisaziun da quel, Gian Derungs.

Interessant program
Il Forum Surselva ei previus uonn venderdis, ils 26 d’october ella Sala Fontauna dil Center da sport e cultura a Mustér. El fuorma la part da referats e discussiuns avon l’avertura ufficiala dall’EX18. Lezza ei previda allas 17.00. Al forum san ils organisaturs beneventar uonn sco referents il caueconom dalla Raiffeisen Svizra Martin Neff, il CEO dall’Arena da skis Andermatt-Sedrun Silvio Schmid ed igl impressari Enrico Uffer dall’Uffer SA a Savognin. Ina discussiun al podi menada da Corinne Staub terminescha la part tematica dil Forum Surselva d’uonn. Per Gian Derungs ei la constellaziun dils referats d’uonn danovamein fetg buna: «Cun Enrico Uffer havein nus era in referent ch’enconuscha fetg bein las cundiziuns dalla fiera ella periferia.» Il Forum Surselva vegn dil reminent purtaus dalla Giuvna combra d’economia Surselva e dalla Regiun Surselva. Da quella simbiosa cun forum ed exposiziun spetgan ton Gian Derungs sco la presidenta dall’EX18, Rita Huonder, avantatgs vicendeivels: «Forum ed EX van bein a prau in cun l’auter ed aschia savein nus cumbinar duas interessantas caussas, pertgei ei dat aunc avunda termins. Igl ei segiramein era aschia ch’in ni l’auter che vegness forsa buc all’EX ni al forum nezegia tuttina quella caschun d’esser cheu quei di.» Per quei motiv resta l’EX18 lu era aviarta igl emprem di entochen allas 23.00. Derungs spetga rodund 200 participontas e participonts al Forum Surselva. Il forum d’uonn stat sut il tetel «Success dalla Surselva?».

Las preparativas marschan
Biebein 80 exposituras ed expositurs ein s’annunziai definitivamein per l’EX18.
«Nus havein aunc entgins meters per enzatgi che vul tuttina aunc s’annunziar, leutier era preits per reclamas», di Huonder. La surfatscha vendida a munta rodund 1300 meters quadrat, quei che stat en rama dils davos onns. Ils plans dall’exposiziun ein publicai sin la homepage www.ex18.ch. Sis annunzias ha ei dau entochen ussa per la concurrenza d’innovaziun «Genius». Scolas han aunc la pusseivladad da s’annunziar entochen miez settember, ils projects ston allura vegnir inoltrai entochen la fin da settember. La premiaziun dallas lavurs ei previda ils 18 da schaner 2019 en claustra a Mustér. Sper la purschida dallas exposituras e dils expositurs offereschan ils organisaturs era uonn in vast program da rama. L’EX18 ha liug dils 26 entochen ils 28 d’october.