News-Details

Extendiu il survetsch

02.08.2018

(anr/hh) La carta da hosps da Sedrun Mustér Turissem ei per in’attracziun pli reha. Da niev sa quella carta digitala era vegnir nezegiada per mieds dil traffic public, denter auter la Viafier Matterhorn Gottard. Sco quei che Sedrun Mustér Turissem scriva en ina communicaziun als mieds da massa, ein cartas da hosps in bien mied per animar ils hosps da vacanzas da passentar pli ditg lur temps liber en ina destinaziun. «Aschinumnai walk-ins, pia hosps che sesanflan sin via atras ina destinaziun e reservan mo ina notg en hotel, san spert vegnir animai da star entgins dis pli ditg. La cundiziun ei denton ch’ins sappi perschuader els dils avantatgs d’ina prestaziun supplementara cumprida el prezi», di Hans-Kaspar Schwarzenbach, directur da Sedrun Mustér Turissem. Gia igl onn 2003 ha el introduciu ina carta d’all-inclusive ad Arosa. Pendicularas, bogns ni era plazzas da minigolf e mieds dil traffic public han denton differents sistems da registraziun. Per quei motiv eis ei ina sfida da cattar il dretg mied – pia in sulet bigliet – per ch’ils hosps sappien nezegiar tut quels survetschs senza sforzs supplementars. Tier la purschida principala dalla carta da hosps da Sedrun Mustér Turissem, numnadamein la Viafier Matterhorn Gottard cun rodund 100'000 frequenzas da hosps da vacanzas, ei quei sistem da controlla e registraziun buca staus pusseivels da cumbinar entochen oz. Per quei motiv stuevan tuttas registraziun succeder a maun. «La Viafier Matterhorn Gottard lavura cul medem sistem da controlla da bliets sco las Viasfier federalas ed haver access a quei sistem ei buca stau aschi sempel», di August Schärli da TMC-Enluf SA.
Per exempel via telefonin
Ensemen cun la TMC-Enluf SA ha Sedrun Mustér Turissem ussa anflau la soluziun pil svilup dalla carta da hosps www.4tix.ch. Aschia sa l’organisaziun da turissem sisum la Surselva porscher ussa als hosps da vacanzas l’emprema carta digitala che sa era vegnir nezegiada per ils mieds dil traffic public. Tenor Schwarzenbach porscha quella soluziun biaras pusseivladads el management da product turistic. Aschia eis ei pusseivel da nezegiar survetschs dalla Viafier federala, la Viafier retica, pendicularas ni era empustar spisas senza ch’ei fetschi da basegns da haver bons persuenter ni stuer pagar quels en bar. Medemamein eis ei pusseivel d’eruir fetg spert las frequenzas. «Aschia savein nus dir enteifer cuort temps cons hosps che han per exempel dau minigolf entochen oz e cons ch’ein stai con stedi sil cuolm», di Hans-Kaspar Schwarzenbach. Tut ils hosps retscheivan lur carta «4tix» cun posta electronica per mail. Quella san els stampar ora ni registrar el wallet sil telefonin. Tenor Schwarzenbach registreschan il mument aunc sulettamein 17 pertschien dils hosps lur carta el telefonin, la gronda maioritad stampa ora quella a casa. August Schärli ei perschuadius: «Il temps lavura per nus e la digitalisaziun el turissem ha grondas schanzas per plazs da lavur qualitativs e pretensius ellas regiuns da muntogna.»