News-Details

Garantir la qualitad cun in sistem da controlla

07.08.2018

DA HANS HUONDER / ANR
Cun la finamira da porscher dapli al turissem da stad vegn la pendiculara
nova da Sedrun sil Cuolm da Vi baghegiada. Per che quella purschida porti
fretg, drova ei ulteriuras pusseivladads da sedivertir e d’activitad sil cuolm.
Entgins projects leusi ein instradai.

El program d’activitad dils proxims onns scrivan las autoritads communalas da Mustér: «Nossas sendas ein in dils focus che la suprastonza communala ha fixau. Il focus vegn mess sin mantener e meglierar las sendas existentas ed aschia alzar la qualitad da nossa purschida ed infrastructura turistica. Per garantir ina reit
d’aulta qualitad sto in sistem da controlla vegnir fixaus. Il project general cun in concept da segironza da qualitad duei vegnir elaboraus per dar il fil tgietschen necessari. En quei project duei era vegnir integrau differents projects novs che aulzan quella purschida en ina categoria pli aulta.» Cun auters plaids: Nezegiar il
slontsch dil trend turistic da viandar ed aschia procurar che la glieud che vegn a Mustér per ir els cuolms retuorni.
Tgei vul quei dir?
«Nus lein controllar sistematicamein las sendas la primavera e lu far las lavurs necessarias vid quellas mintgamai en vesta alla stagiun da stad. Las sendas el territori da Caischavedra han prioritad en quei grau», di il menader dall’infrastructura communala, Ervin Maissen. La vischnaunca ha tschaffau sia reit da sendas da
viandar che cumpeglia ina lunghezia totala da rodund 160 kilometers. En sia lavur vid sendas lavura ella cul plan d’inventar da sendas dil cantun. Enteifer quella reit ein prioritads definidas: «En quei connex registrein nus era las lavurs che vegnan fatgas.» Mintga liug cun in muossavia ei registraus e vegn actualisaus tenor basegns. Rodund 250’000 francs impunda la vischnaunca da Mustér annualmein per sias sendas. Part da quellas expensas ein era las lavurs da rumida da neiv sin las sendas d’unviern. Migliurau ha la vischnaunca era l’infrastructura turistica sanitara a Mumpé Tujetsch, ferton che quella a Mumpé Medel ed a Cavardiras era gia avon maun. En mira ha ella era ina semeglionta purschida a Clavaniev.
Entginas sendas novas
El territori da Caischavedra, il Cuolm da Vi e Gendusas eis ei previu d’adattar e cumpletar la reit da sendas da viandar. Tenor Ervin Maissen vegn la senda existenta da Caischavedra a Stavel slargada sin 2,5 meters. Las pendicularas han l’intenziun d’activar leu la tegia dil Stavel. In concept persuenter exista denton aunc
buca. Naven dil Cuolm da Vi duei vegnir erigiu ina nova senda tiel Péz las Palas–Parlet atras la Val Segnas entochen Stgeinas e cuntinuaziun ella Senda Pauli. Per part consista quella ruta gia da sendas. Dil Cuolm da Vi anora existan gia differentas sendas da viandar aschia enviers Gendusas dadens, Lai Alv ni era Gendusas dadens enviers Cungieri. Da quei territori anora sa denton era vegnir viandau viers la Muota da Magriel ni a Verclisa, sco era da Gendusas al Lag da Tgauns enviers Caischavedra ni il Lag Serein. Per las activitads da stad el territori da Caischavedra, Cuolm da Vi e Gendusas exista in plan ch’ei vegnius pretendius dil cantun en vesta alla construcziun dalla pendiculara. Tenor quei plan eis ei era previu da migliurar las pusseivladads d’ir cun velo e reiver. El rom da quel ei era previu ina senda blaua da Lai Alv enviers il Péz Ault cun ina nova colligiaziun
viers la camona da Cavardiras. In’ulteriura varianta che vegn considerada ei ina senda sur il Péz las Palas giul Bostg. Ina tala stuess denton vegnir segirada cun sugas e scalas.
Ella vischinonza dil vitg
Mo buca mo al cuolm, mobein era el funs dalla val spel Rein, ha Mustér potenzial per attracziuns. La senda entuorn Salaplauna sesanfla dapi onns sil program dalla vischnaunca sco era el plan general dall'infrastructura. La finamira fuss da cumpletar la senda aschia ch’ins sa serender en ina runda cumpleina entuorn Salaplauna. Sin la senda da Cuflons a Fontanivas sepurschess la caschun per in’attracziun che pertucca il Rein. «En in liug buca lunsch naven dalla senda existenta ha il Rein mulau il grep e creau interessantas fuormas da bellezia singulara. Per dar la pusseivladad da prender investa da quellas fuss ei necessari da prender mesiras da construcziun», di Ervin Maissen. En quei connex fuss previu ina punt.