News-Details

Optimissem e slontsch all’EX

29.10.2018

(anr/sr) All’EX18 a Mustér han ils visitaders buca sulet saviu veser la purschida ni degustar ils products dils 85 expositurs, mobein era astgau sentir lur optimissem. Sepresentadas ein gest enzacontas fatschentas «novas» ch’ei deva aunc buca alla davosa EX avon quater onns. La tenuta ed il slontsch dils expositurs ha guess pudiu encuraschar enqualin e cumprovau ch’il futur en Surselva ei dètg empermettents. Ei va senz’auter d’haver success ella regiun cun purschidas tradiziunalas, innovativas e corrispundentas als giavischs dalla clientella. La vasta e buna purschida dallas interpresas ella regiun ha franc era animau enqualin da (puspei) far lur fatschentas, cumpras e surdar lavurs en Surselva. Ei dat numnadamein quasi nuot ch’ei dess buc era cheu e sch’ins sa danunder ch’in product vegn ni enconuscha il mistergner che surpren ina lavur dat quei tut in auter sentiment. All’EX18 ein las sentupadas stadas numerusas e cordialas ed era las nevaglias han buca pudiu influenzar pli ch’in ton il plascher da far ina viseta all’EX.

«Glieud cuntenza ei la pagaglia»
Avon rodund in onn e miez han Rita Huonder-Tenner, la presidenta dil comite d’organisaziun, e siu team entschiet cullas preparativas per l’EX18. Sco ella ha declarau ei quei stau in temps cun dabia lavur ed oravontut ils davos dus meins ein ella ed il comite d’organisaziun stai occupai intensivamein cullas preparativas per che tut gartegi la finfinala duront ils treis dis d’exposiziun. Huonder- Tenner ei l’emprema dunna che presidiescha l’exposiziun da commerci e mistregn a Mustér ed ella fa quei cun grond plascher ed entusiassem. Sco ella ha declarau en discuors cun l’Agentura da novitads rumantscha eis ei impurtont da s’engaschar per in bien avegnir, buc il davos era per viver avon allas generaziuns pli giuvnas ch’ins sto far enzatgei sch’ins less haver bien era el futur. Gest ella periferia eis ei era impurtont d’haver successurs ed en quella situaziun favoreivla ein, sco Tenner-Huonder ha declarau, actualmein gest enzacontas fatschentas ch’han exponiu all’EX18. Era ella e siu um han cun lur fegl Remo in bien successur per lur garascha Auto Huonder. All’EX han ils visitaders pia viu ch’ei dat cuntinuaziun ed era ch’ei dat interprendiders culla curascha da fundar novas fatschentas e quei slontsch ha franc era animau enqualin da far in pass pli curaschus. Sco Huonder-Tenner ha declarau ein las reacziuns dils expositurs e visitaders trasatras stadas positivas. «Jeu hai survegniu mo lauds e quei fa grond plascher», ha la presidenta manegiau cun satisfacziun. Quei ch’ella ha adina puspei era astgau udir ein lauds per l’atmosfera familiara che regia all’EX, in’atmosfera speciala ch’ins anfli struschamein a caschun d’exposiziuns da mistregn e commerci ella Bassa.