News-Details

Pign e grond a fiera s. Martin

13.11.2018

DA SUSI ROTHMUND / ANR

Ier ei la tradiziunala fiera da sogn Martin a Mustér sesplegada da bun’aura d’atun e biars han nezegiau la caschun da s’entupar cun enconuschents. Sco ils marcadonts ein era ils visitaders dalla fiera vegni da differents loghens dalla Surselva ed era da pli lunsch naven. Propi veta survegn quella fiera ch’entscheiva la damaun mintgamai pér encunter miezdi. La pausa da miezdi ha beinenqualin passentau alla fiera nua ch’ei ha tier in ni l’auter dils 60 stans la pusseivladad da guder in bien gentar. Massa visitaders nezegiau quell’isonza dil november per degustar in bien caschiel, in prezius daguot ni fors’in paun da fiera (Magenbrot) dultschin. En mintga cass ha ei dau per mintga gust enzatgei e per quels che patratgan gia vid Nadal ha ei dau massa stans cun cudischs, cartas, termagls ni decoraziuns ed objects d’artisanadi per cumprar sco regal.

Dalla fiera da purs alla fiera d’artisanadi e bia auter

Ier ha la fiera da sogn Martin attratg massa glieud a Mustér

Dapi tschentaners ha la fiera da sogn Martin liug a Mustér. Ella ei aunc oz in impurtont liug da sentupada. Sia muntada da pli baul sco tierm impurtont per pagar ils deivets ha la fiera denton piars gia daditg ed adina daplirs marcadonts jasters paran da postar lur stans alla Via Lucmagn.
Igl ei usitau che la fiera da sogn Martin vegn organisada il gliendisdis ch’ei il pli datier dils 11 da november, il di da sogn Martin. Ier eis ei puspei stau aschi lunsch, in tschancun dalla Via Lucmagn ei vegnius serraus la damaun baul pil traffic ed ei semidaus en ina fiera cun rodund 60 stans. Dabiars cun products d’artisanadi sco
cheramicas ni decoraziuns, rauba bein adattada per far in regal ni l’auter. Dasperas sco ei s’auda ils brassamaruns ed ils vendiders da paun-piziulta (Magenbrot) ni ils marcadonts da resti, bischutaria e termagls che paran da prender si pli e pli bia spazi enteifer la fiera. Ina sparta ch’ei dapi biars onns adina presenta
alla fiera da sogn Martin ein las instituziuns sco la Casa Soldanella da Rueras, l’Argo da Glion, la Casa Depuoz da Trun ni era la Ludoteca Mustér ed il Club da Lions dalla Tgina dil Rein. Els ein leu per vender lur products, rimnar daners per ina buna caussa, mo en emprema lingia per mussar presenza ed empustir contacts. Dapi onns ei quei buca pli ina fiera da purs sco pli baul, tuttina ha in ni l’auter pur purschiu ses products sco caschiel ni mèl d’aviuls ed auter. Pettas, tustgets, paun e petta cun péra vegnan denton buca pli mo dallas puras, mobein era da casarinas che fan quei cun grond anim e tschaffen. Presentas alla fiera da sogn Martin ein era la gronda part dallas fatschentas alla Via Lucmagn. Enstagl da schar zuppar vi cun stans postan ellas sezzas empau da lur sortiment avon esch sin in stan e carmalan aschia la clientella viaden ellas stizuns. Ils luvrers dalla vischnaunca da Mustér, Nazi Flepp e Sep Antoni Schuoler, han mirau che tut funcziuni ier ed ein era stai ad incassar las contribuziuns pils stans. Per els ei quei ina lavur sco in’autra era, mo secapescha ch’ei gaudan era da s’entupar e dar ina paterlada ni l’autra. Il pli stentus seigi ei la damaun sch’enqual marcadont vegni
memia tard e possi lu strusch atras pli, quei detti empau menaschis. Flepp sa aunc seregurdar bein dil temps ch’ils purs pagavan lur deivets a caschun dalla fiera da sogn Martin ed il persunal d’alp survegneva la paga quei di. Era el hagi survegniu cheu sia paga cun biebein 21 onns suenter ch’el eri staus tersiel sin l’Alp Pazzola. Survegnir la paga en in liug nua ch’ei dat tontas bunas e bialas caussas da cumprar po esser prigulus? «Moh, na, grad la paga erel jeu nuota vegnius da far ir cheu», ha Flepp manegiau riend. Empau dapli tempra purila
ha la fiera survegniu uonn entras l’idea digl ustier dil buffet dalla staziun a Mustér. All’Uniun Center sursilvan d’agricultura ha l’idea da vender caschiel d’alp sin in stan numnadamein plaschiu. Aschia han Tabea Baumgartner e Marcus Duff realisau quella ed ein stai presents cun in spazius stan e caschiel d’alp dallas
alps Naustgel, Glivers, Nadels, Puzzetta, Pazzola, Russein e Sevgein. El medem liug han numerus visitaders aschia saviu degustar e cumprar da tuttas sorts caschiel ed haver endamen empau diltut.