News-Details

La rundella sto spitgar

06.12.2018

(anr/hh) A sia seduta da l’autra jamna sefatschenta il cussegl da vischnaunca da Mustér denter auter dall’idea, respectivamein d’in postulat pertuccont ina rundella pil traffic ad Acla da Fontauna. Il postulat ei vegnius inoltraus avon in onn dil cusseglier da vischnaunca Wendelin Jacomet ed ei vegnius suttascrets da nov ulteriur(a) cusseglier(a)s. Il postulant constatescha ch’il traffic sin la cruschada dalla Via cantunala e la Via d’Acletta ad Acla da Fontauna a Mustér vegn a crescher marcantamein il proxim temps. Tenor el pretenda quei mesiras.

Realisar ina rundella
Il postulat pretenda da realisar in project d’ina rundella ed in sutpassadi ad Acla da Fontauna. Cun quellas duas mesiras duei la segirtad dil traffic d’autos, pedunzs e ciclists vegnir garantida. Ils baghetgs realisai ni che vegnan aunc realisai el territori d’Acla da Fontauna, S. Catrina ed Acletta carmalan neutier dapli glieud. Ina rundella havess – aschia Jacomet – la finamira da reglar meglier il traffic sil tschancun dalla punt dalla Via cantunala a Funs-Acla da Fontauna en direcziun Sedrun e Cuera, respectivamein enviers Acletta. «Pils pedunzs e ciclists che vulan traversar la Via cantunala duei in sutpassadi garantir la segirtad», scriva Jacomet. Sco exempel persuenter numna el la rundella a Laax/Murschetg. Tenor il cusseglier da vischnaunca ei la caschun da realisar quei project dada damai che la societad pil svilup dil project dil hotel ad Acla da Fontauna surlavura siu project. Ensemen cun ella duessen il cantun e la vischnaunca empruar d’anflar ina soluziun pil traffic. Medemamein tematisescha el il traffic public. Ina fermada pil bus local seigi necessaria da mintga vart dalla via.
Ina soluziun vesa el era ch’igl ei da cattar pigl access naven dalla Via cantunala enviers
la staziun dalla Viafier Matterhorn Gottard, priu il cass che la staziun survegn puspei l’impurtonza sco a sias uras cura ch’il hotel Acla da Fontauna era en funcziun.

Temps aunc buca madirs
Sco quei che la suprastonza communala scriva uss en sia risposta al postulant ei il temps per examinar soluziuns futuras pil traffic el liug aunc buca madirs. La fermada dil bus dad omisduas varts dalla Via Acletta ad Acla da Fontauna duei vegnir giudicada en connex cul project pil hotel niev ad Acla da Fontauna. Concernent il sutpassadi pils pedunzs e ciclists scriva la suprastonza communala: «L’actuala situaziun pils pedunzs e velocipedists ad Acla da Fontauna duei vegnir sligiada en connex culs projects hotel Acla da Fontauna e Center da sport e cultura. Per quei motiv duei vegnir spitgau entochen che quels projects ein pli concrets.» Per la via per pedunzs dalla staziun dalla Viafier Matterhorn Gottard entochen Acla da Fontauna seigi previu el plan da quatier ina nova sbuccada.

Dretg dils burgheis
Medemamein sefatschenta il cussegl dalla revisiun dalla lescha davart il dretg da burgheis. Sebasond sin la lescha dil dretg da burgheis dil cantun Grischun ston las vischnauncas burgheisas relaschar prescripziuns davart la concessiun, la garanzia e la renviada dil dretg da burgheis communal. En special ston ellas reglar la cumpetenza, la procedura e las taxas. La vischnaunca da Mustér dispona d’ina lescha pil dretg da burgheis. Ella datescha digl onn 2009. Ussa ha ei denton num adattar ella. En art. 18 dalla lescha federala davart il dretg da burgheis ha la confederaziun fixau naven da 2018 per l’emprema gada in cuoz maximal ch’ina persuna sto esser domiciliada en in liug per saver tschentar la damonda pil dretg da burgheis. Il cantun ha surpriu il cuoz maximal da dimora da tschun onns. Ils davos dus onns sto la persuna esser domiciliada nuninterruttamein ella vischnaunca ch’ha retschiert la damonda d’impatriaziun. Sebasond sin la lescha dil dretg da burgheis dil cantun Grischun stat ei liber allas vischnauncas burgheisas da pretender ina dimora nuninterrutta d’entochen tschun onns. Tier la revisiun dalla lescha dil dretg da burgheis communala setracta ei d’in’adattaziun al
dretg surordinau. Senza reglar el dretg communal las premissas da domicil per obtener il dretg da burgheis valessen las prescripziuns cantunalas, meins severas. Leu nua che la lescha communala regla nuot vala la legislaziun cantunala e federala. En sia davosa seduta da quest onn elegia il cussegl da vischnaunca era il president e vicepresident pigl onn vegnent. En elecziun vegn medemamein il vicepresident communal muort la demissiun digl actual vicepresident, gerau Iso Mazzetta, sin la fin digl onn.