News-Details

Pendiu la lescha dil celibat

05.03.2019

DA HANS HUONDER / ANR

La lescha dil celibat ei vegnida sentenziada alla mort il gliendisdis tscheiver dalla Dertgira nauscha a Mustér. Ei stoppi vegnir fatg ina fin al scamond da maridar pils prers. La gliesta da tractandas dil tribunal da tscheiver ei stada liunga. Aschi liunga che la tschentada ha stuiu vegnir interrutta – sco mintg’onn – e surschada per divertiment allas musicas da tscheiver. Il punct culminont dalla Dertgira nauscha el vitg a Mustér ei la sentenzia finala stada. Uonn ha ella tuccau la baselgia catolica. Ils derschaders ein stai dil meini che la lescha dil celibat s’audi defintivamein vid la fuortga. Ils prers astgien haver secretarias, casarinas e calustras, mo buc ina dunna: «Gie, donn e puccau. Lu havess ins ina ga in augsegner giuven ord nies miez e lu sto el trer tut dil tempel en perquei ch’el ha tuppamein anflau l’amur dalla veta. Enzatgei che schai ella natira dil carstgaun e ch’ins sa buca semplamein tschentar giu cun smaccar in nuv. Las tschittas el venter setegnan buca
vid las leschas dalla baselgia.» Pendicularas, organisaziun da turissem, politica, cultura, vias da meglieraziun e fu siuns da vischnaunca han fa tschentau la Dertgira nauscha aschi bein sco la Posta e la Casa Hess a Mustér, il lag a Salischinas a Sumvitg, l’ustria da Cungieri a Sedrun ni era l’activitad da fullar via e las novas tendenzas da ri sguardar schicanas tier las vias cantunalas.

La Dertgira nauscha ha salvau sia 31avla tschentada la sera da gliendisdis tscheiver a Mustér

«Era uonn ha ei secapescha dau cass hanai che nus havein giu da discussiunar notgs alla liunga. Gie aschi hanai che nus ughegiein buca da tractar quei da bi clar di.» Cun quellas construcziuns ha il tribunal da tscheiver da Mustér lantschau sia 31avla seduta. Cun la Dertgira nauscha a Mustér vegn la part principala dil tscheiver sisum la Surselva terminada. Il gliendisdis sera ha quella giu liug el vitg da Mustér. La gliesta da tractandas ei stada fetg liunga. In protocol stampau da quellas sco ei ha dau ils davos onns ei buca vegnius publicaus uonn: «Nus essan dil meini che quels ch’han propi interess sepresentan questa sera cheu ed ils auters interessescha quei gie probabel buc.» La Detgira
nauscha ei vegnida preparada e presentada da Tina Bundi, Eugen Monn e Gion Hosang.

Neiv e schlaghers

Ina dallas tractandas principalas dalla Dertgira nauscha d’uonn ein las vias e la rumida da neiv stadas. «Quest unviern ha ei puspei ina gada dau empau neiv. Atgnamein zatgei tut normal. Pudess ins tertgar. Mo Mustér ei tuttenina – gest pervia da quella neiv – staus grond e gries ellas medias: «Disentis gleicht einer Geisterstadt.» Mo en tut la furia da rapportar da quella sensaziun ein las medias apparentamein buca sefatgas en ch’ei dat aunc in pèr auters vitgs sper Mustér e Sedrun sch’ins varga si Sumvitg…» Sche quei fetschi da basegns, sedamonda la dertgira: «Atgnamein fuss Sumvitg aschia ni aschia il davos vitg en Surselva.» La dertgira rapporta dall’activitad da fullar via e better ora neiv. A Mustér mondi quei ruc-zuczack-zack. En Val Tujetsch ei la febra da schlaghers rutta ora: «Ils Tuatschins paran semplamein buca da survegnir avunda da schlaghers. Suenter ch’ei ha dau dus mega events si Dieni ch’ein dai ell’aua – respectiv il davos ella neiv – emprova ina nova uniun cun ina part dils vegls organisaturs da metter in niev event sin peis. Il num dall’uniun – Verein Rheinquelle Events – ei circa aschi creativs sco l’idea d’organisar ina fiasta da schlagher en ina halla da betun.» E la Dertgira nauscha sa era pertgei che Sumvitg vul fusiunar cun Trun. Suenter ch’il runal a Rabius ei buca pli ed ei hau dau dapi lu bia neiv veglien els puspei saver dir ch’els hagien era in runal: Quel dalla Pera.

Mecca dad ir a spass
Culla meglieraziun ei Mustér sin buna via da daventar il niev Mecca da spassegiar», constateschan ils treis derschaders. Quei fussi ina stupenta caussa, mo il crutsch da quella seigi ch’ei detti negina illuminaziun per la notg. Forsa dessi ei aunc enzanua ellas profunditads dalla cassa communala in pèr daners per montar in per latiarnas per liung da quella e forsa aunc in pèr autras vias da spasse giar en vischnaunca: «Envidar quellas savess il president dil cussegl da vischnaunca. La finala astgan ins pretender da far enzatgei per haver la honur d’haver quei post. Il post da stizzar las candeilas savess il niev suprastont communal surprender. El ei aschia ni aschia il davos che va mintgamai a casa, aschia che quei va grad enina.» La Casa Hess ei venala. Tochen ch’enzatgi levi aunc ella hagien ei buca vuliu vender, ussa ch’ei veglien vender, vegli negin ella. Dallas tractandas dalla Dertgira nauscha ei era buca la politica a Medel mitschada. In da Mustér stoppi tener neu il tgau sco president. Ed aunc enzatgei da Medel, respectiv da Sumvitg: «Ferton ch’ils da Sumvitg sunavan ella musica da Medel – tochen ch’ei deva aunc quella – sunan ils da Medel ella gugga da Sumvitg. Also, jeu saiel buca daco ch’ils da Sumvitg fan insumma ponderaziuns da fusiunar cun Trun cu tut ei aschi clar.»

Cungieri lai salidar
La Dertgira nauscha constatescha: «Pils Tuatschins hai igl emprem buca dau avunda stgisas e metodas per frenar la pendiculara dil Cuom da Vi – silmeins per certins. Ed ussa tuttenina eis ei tuttina iu memia plaun. Pertgei gia avon che la pendiculara dil Cuolm da Vi ei en funcziun ei l’ustria a Cungeri aviarta. Nus sedumandein daco ch’ei drova lu exnum ina sortida per Cungieri sch’ei va era senza pendiculara? Mo las pendicularas da Mustér han era giu da cumbatter cun baghegiar ella. Quei fa gie era buca surstar – sch’ils da Mustér baghegian en Tujetsch. Cheu san ins mo dir: Sch’il terren fuss aschi dirs sco il tgaus stinai dils Tuatschins, lu havess ei buca dau problems da francar il mast.» In’interessanta constataziun ha la Dertgira nauscha era fatg pertuccont la Posta: «Gie, avon 100 onns tunscheva ei da scriver sin la brev sco adressa «per mia tatta, Mustér». Avon 75 onns lu «per mia tatta Maria, Mustér». Avon 50 onns lu «per mia tatta Maria, 7180 Mustér». Avon 25 onns «per mia tatta Maria, Dulezi, 7180 Mustér.» Ed oz? Oz eis ei da scriver «Dunna Maria Cahenzli, Via Dulezi 007, 7180 Disentis/ Mustér» e paupra sch’ei stat mo si Via Dulezi senza numera, lu sas esser segirs che la brev vegn anavos, buca da Mustér, mobein d’enzanua ella Bassa ord in center da brevs.»

Pendiu il delinquent
La finfinala ei la Dertgira nauscha vegnida tier sia sentenzia finala, quella che vegn spitgada dils auditurs ed aspectaturs cun desideri: «Quei cun quels posts d’uestgs ed augsegners tiels catolics eis ei empau ina caussa. Ins sto schon sedumandar tgei che va il cuntrari ch’ei dat mo mintga quater tempras in augsegner ord nossa regiun. Gie propi. Pertgei ina plazza d’augsegner ei tuttina ina plazza segira per veta duronta. Igl ei pagau bein, in augseger ha darar stress, el ei siu agen patrun, ha ina stupenta dimora che vegn messa a disposiziun e forsa ha el era aunc in auto da fatschenta. Mo segir ha el era ina secretaria, ina casarina, en mintga baselgia ina calustra… mo si’atgna dunna, lezza astga el buca haver.» Per quei motiv ein ils derschaders stai dil meini ch’ei seigi da pender la lescha dil celibat. Damai che la derschadra ei reformada han ils dus derschaders surschau il delinquent ad ella.