News-Details

Il 40avel til da tscheiver a Mustér

05.03.2019

Il 40avel til a Mustér
(anr/abc) Senza ellas dess ei probabel negin til a Mustér. La scola primara e la scoletta han presentau sujets originals. L’Uniun da tscheiver da Mustér ha organisau per la 40avla gada il barlot. Las scolas han mussau bia creativitad e senn per bialas figuras e mascras. La sisavla ei sepresentada sco rispials gigants cul sujet «Plan d’instrucziun 21». Sogn Pieder ha honorau igl engaschi da rodund 500 persunas. Aspectaturs e participonts han buca stuiu temer ch’els vegnien bletschs ni stoppien schelar. Duas gruppas da Tujetsch ein separticipadas al til cun lur carrs. Ils Frabiziechels han fatg canera sillas vias da «Mustair» cun lur Heli Tujetsch. L’autra, la Banda da Stiarls, ha rendiu attent als glatschers che liuan. Era ils Amitgs da tscheiver da Trun han mintg’onn grondius sujets, uonn ein els sepresentai sco Dieus e Dieuas greccas. Suenter quels a Glion, Trun e Sedrun ei il til a Mustér staus il davos ella retscha dil barlot sursilvan.

Viseta al tscheiver a Mustér
DAD AUGUSTIN BEELI / ANR
Bunas ideas, creativitad, oravontut affons e carschi cuntents ed era bun’aura: Quei ha dominau il til da tscheiver 2019. Tut ch’ei semuentau sonda suentermiezdi el ritmus dallas guggas
. L’Uniun da tscheiver Mustér ha puspei sedau gronda breigia da concepir in tscheiver bi e dign. Sogn Pieder ha honorau quei culla bun’aura. Aspectaturs e participonts han buca stuiu temer ch’els vegnien bletschs ni stoppien schelar. Suenter il cuort disturbi dil venderdis era il sulegl puspei semussaus. All’uniun purtadra dil tscheiver ei quei stau d’engrau. Il motto ch’ella ha eligiu ei «Per vias e strias». Il til da Mustér ha saviu festivar uonn in pign giubileum. Per la 40avla gada ha l’uniun da tscheiver organisau quel. En tut ein 19 gruppas seformadas allas 14.00 alla staziun. Silla ruta usitada Via Lucmagn-Via Alpsu tochen el Center da sport e cultura han ils aspectaturs saviu admirar 19 gruppas e sujets. La gruppa da gimnastica babs, mummas e pigns ha dau combas suenter ils tuns dallas Fifferlottas da Segnes. En lur costums oranschs han ils drags dau en egl. Sper las Fifferlottas e las Bagordas han ils Vagabunds da Sedrun, Las Zoclas da Sumvitg e Las Lieurs da Trun embelliu il til. La gugga dils Papagenos dad Oberägeri ei viagiada uonn a Mustér. Cun siat gruppas ein la scola primara e la scoletta da Mustér stadas representadas stupent. Ils affons gaudan quei divertiment cun costums, mascras e confetti. Tras lur atgna experientscha vegnan els a purtar vinavon igl usit
dallas bagordas. La scola mereta in cumpliment special per sia collaboraziun cull’uniun da tscheiver. Duas gruppas da Tujetsch ein separticipadas al til cun lur carrs. Ils Frabiziechels han fatg canera sillas vias da «Mustair» cun lur Heli Tujetsch. L’autra, la Banda da Stiarls, ha rendiu attent als glatschers che liuan. Da Trun ein ils Amitgs da tscheiver vegni. Els han mintg’onn sujets grondius, uonn ein els sepresentai sco Dieus e Dieuas greccas. Suenter quels a Glion, Trun e Sedrun ei il til a Mustér staus il davos ella retscha dil barlot sursilvan. La suprastonza dall’uniun da tscheiver cul retg dils narrs Gionduri Maissen alla testa ha repartiu alla glieud bandierettas cul program. Sin quel han ins saviu leger che varga 500 persunas sedattan gronda breigia da presentar bials sujets. Culla cumpra dalla medaglia da tscheiver han ils aspectaturs saviu remunerar quellas stentas. Antonino Di Bella ha puspei creau quella plachetta. Il motto d’uonn «Per vias e strias» ha l’uniun da tscheiver eligiu per render attent alla meglieraziun da funs ch’ha entschiet e che vegn a fatschentar la vischnaunca da Mustér ils proxims 40 onns. Il program da tscheiver a Mustér cuntinuescha oz gliendisgis, ils 4 da mars 2019 allas 13.30 cul til da tscheiver dils affons, divertiment e premiaziun da mascras en halla Cons. La sera allas 20.00 ei la Dertgira nauscha sin plaz scola cun participaziun dils Vagabunds, las Bagordas e las Fifferlottas.

Fotografias dil til da tscheiver 2019