News-Details

Novas dalla claustra

04.07.2019

(cp) Dumengia proxima, ils 7 da fenadur ha la fiasta en honur dils sogns fundaturs dalla claustra Placi e Sigisbert liug.  Cunquei che la baselgia claustrala ei serrada tochen ils 11 da november d’uonn pervia dalla restauraziun vegn la messa pontificala celebrada ella baselgia parochiala S. Gions a Mustér. Celebrant principal e predicatur ei avat Urban Federer da Nossadunnaun. Il chor dalla claustra conta - sut direcziun da Peter Werlen –  la  «Nikolaimesse» da  Joseph Haydn,  cun  accumpignament digl  orchester Desertina. La messa vegn transmessa sur televisiun vi en halla a Cons. Entschatta ei allas 09.30.La processiun suandonta va naven da S. Gions sur la Via da Cons, quella da scola tochen si avon porta claustrala. Naven dallas 14.00 ei era la cripta da s. Placi aviarta per oraziun tgeua avon las reliquias. Allas 15.00 han las viaspras pontificalas liug ella baselgia da Nossadunna.

«graubündenVIVA» offerescha

El rom dil program «graubündenVIVA» ha liug gliendisdis, ils 15 da fenadur – dallas 16.30–20.00 –  en  claustra il  di d’informaziun davart il tema «Tradiziuns da berniers e claustra». Suenter ina cuorta guidada tras la claustra san ils participonts  visitar il curtin dalla claustra. Lu vegn il historicher Adolf Collenberg a referir davart rapports historics da viadis da carstgauns e lur cuschina el Grischun. Inclus  igl  apero  riche ord  la  cuschina claustrala cuosta quei 35  francs. S’annunziar sut: www.graubuendenviva.ch.

Uniun d’anteriurs sin social media

L’Uniun dils anteriurs dalla scola claustrala ei uss era presenta sin social media. Specialmein surveschan quels portals per communicar eveniments, novitads ed infos davart l’uniun. Era duessen quellas duas medias possibilitar in brat denter giuvens alumni ed anteriurs. Quei facilitescha il start els studis universitars e sa schizun survir  –  suenter ver  terminau all’universitad –  per tschercar posts da praticums e jobs.