News-Details

La Casatec SA ha retratg las localitads da fatschenta novas

11.07.2019

DA HANS HUONDER / ANR


Rodund in onn han las lavurs da sanaziun e d’endrizzament dil niev Center Casatec a Mustér cuzzau. Dapi entginas jamnas ei igl entir menaschi dall’interpresa ussa leu sut in tetg. Il baghetg che s’udeva a Somedia e che ha surviu onns alla liunga sco stamparia ha survegniu aschia in niev intent. «En sesez levan nus realisar in baghetg niev a Pignola. Sin fundament da differentas circumstanzias ei quei buca stau pusseivel, aschia che nus havein stuiu tschercar in’autra soluziun. La finfinala essan nus vegni attents sil baghetg dall’anteriura stamparia», di il meinafatschenta dalla Casatec SA, Damian Sac. Il november 2017 ha la Casatec SA allura cumprau il baghetg dalla Somedia. La finamira: Nezegiar las localitads spaziusas aschi bein sco pusseivel pigl agen menaschi, mo era porscher vinavon bunas cundiziuns da lavur e da survetsch all’interpresa da skis Anavon ed alla Canorta d’affons pigns Lumpazi ch’han mussau igl interess da restar vinavon el baghetg.

Sanaziun e concept niev
Suenter in cuort mo intensiv temps da planisaziun e concepziun entras il biro d’architectura Huonder Bisquolm da Mustér han las lavurs da construcziun saviu vegnir lantschadas la primavera 2018. Il baghetg cun ina vegliadetgna da pressapauc 30 onns era bein concepius cun ina buna substanzia e funcziunalitad, mo tonaton ha ei duvrau remeduras, ina nova repartiziun dil spazi sco era in niev dessegn intern ed extern. Quellas lavurs han cuzzau diesch meins ed avon rodund duas jamnas ha la davosa partiziun – l’administraziun – saviu midar casa da Funs a Carcarola. Il plaunterren dil ba ghetg survescha per ina gronda part ad Anavon, l’interpresa da skis. Leu sesanflan denton era magasins e gardarobas dalla Casatec SA sco era la tecnica dalla casa. L’emprem’alzada ei vegnida aviarta davon ora. Aschia eis ei pusseivel da carrar cun autos e camiuns directamein el baghetg. Per descargar rauba dispona l’entrada vinavon d’ina rampa. En quella alzada sesanflan il luvratori sco era ulteriurs magasins dalla Casatec SA ch’ei engaschada sil sectur dallas installaziuns sanitaras, scaldament e ventilaziuns. Cheu ei era l’entrada communabla en tuttas interpresas. Ella secunda alzada sesanflan l’administraziun, la direcziun e recepziun dalla Casatec SA. Sper ils biros ei era d’anflar cheu ina gronda stanza per sedutas sco era ina per scolaziun. Las localitads ein vegnidas modernisadas denter auter cun clima, glisch ed acustica adattada per plazs da lavur. Sper la lavur administrativa dalla Casatec SA vegn era quella da Recal Mustér e Breil fatga leu. Ell’emprem’alzada ein era las localitads
dalla Canorta d’affons pigns Lumpazi.

In impurtont patrun
L’interpresa Casatec SA occupa rodund 50 collaboraturas, collaboraturs ni emprendists. Ell’ei engaschada professiunalmein en Surselva e regularmein era cun ina gruppa da treis entochen tschun persunas el cantun Tessin. Il baghetg niev a Carcarola sut la staziun dalla viafier porscha
en tut ina surfatscha da lavur da biebein 3000 meters quadrat (17 500 meters cubic). Alla Casatec SA porscha il baghetg cundiziuns da lavur idealas per tuts secturs. Leutier vegn in grond diember da parcadis. Il baghetg che sepresenta uss en niev dessegn ei denton era d’avantatg pil maletg dil vitg. Cun la cumpra entras la Casatec SA ha quei edifeci fetg spazius saviu vegnir mantenius vinavon e survescha uss ad in niev intent. «Jeu sundel buca s’enriclaus d’haver cumprau il baghetg. Nus havein cheu ussa cundiziuns da lavur veramein idealas», di Sac. La colligiaziun cun la viafier exi sta aunc adina, vegn denton buca nezegiada il mument. Il baghetg era vegnius erigius igl onn 1988 entras la Stampa Romontscha Condrau SA. Ensemen cul menaschi da stamparia sco tal ei il ba ghetg vegnius els mauns dalla Somedia igl onn 1994. Successivamein ein las partiziuns allura vegnidas dislocadas a Cuera ni sligiadas si. Aschia ein parts dil ba ghetg stadas vitas ils davos onns.

Fundada 1966
L’interpresa Casatec SA ei vegnida fundada 1966 sco Sac e Jacomet a Mustér. El decuors da quels biebein 50 onns eis ella sesviluppada cuntinuadamein ed era carschida sils secturs dallas installaziuns sanitaras, scaldament, ventilaziuns e verdinar. 1996 ha Damian Sac surpriu la direcziun e sut si’egida ei il menaschi carschius vinavon, denter auter cun la cumpra e l’integraziun da menaschis pli pigns dalla regiun. Aschia ei era il radius da fatschenta vegnius extendius successivamein. 2009 ei l’interpresa vegnida structurada da niev e dapi lu porta ella il num Casatec SA. Grazia a sia cumpetenza exequescha la Casatec SA lavurs da sia branscha, mo era lavurs specialas en Surselva, el Tessin sco era en cantuns dalla Svizra orientala. Sin iniziativa e cun sustegn dalla Casatec SA ein ils indrezs per calira a distanza Recal a Mustér e Breil vegni iniziai e realisai. Els furneschan oz biars baghetgs cun energia producida ord stialas. Igl ei pia energia ecologica cun materia indigena.