News-Details

JuHu a Segnas en febra da catscha

31.07.2019

Igl ei gia stau la quarta ga che Segnas ei semidau duront in’ jamna da stad en in vitget cun in tschuat affons, giuventetgna e tgauns. Aschia era dils 21–27 da fenadur, cu 26 buobas e buobs han gudiu in program divertent e variont el camp che steva sut il motto «febra da
catscha».
El center dil camp per affons e tgauns da «Jugend und Hund» ch’ei dat dapi 1998, schai oravontut il plascher, mo ils numerus e zun motivai menaders dattan era vinavon lur vasta savida per luvrar culs tgauns che valan sco ils accumpignaders ils pli fideivels dils carstgauns. Dapi igl emprem camp – che ha da lezzas uras giu liug a Sörenberg – ei Sandra Altorfer, ina menadra ed organisatura dils camps. Tiel team da 18 menadras e menaders s’auda dapi onns era sia feglia Maya che ha – sco ses collegas – immens plascher da luvrar culs affons e lur tgauns.Tenor Altorfer ei la casa a Segnas ordvart adattada per in tal camp ed ei ha avunda spazi per carstgauns ed animals. Culs onns ein era ils possessurs da tgauns ella regiun vegni attents al camp per affons e tgauns, ed Altorfer ha giu plascher che treis dils 26 participonts ein vegni dalla regiun. La filosofia dils menaders ei da sustener il commerci local ed aschia ein tuttas cumpras pil camp vegnidas fatgas a Segnas e Mustér.

Giugs – divertiment – trenament
El camp a Segnas han ils affons saviu guder in program ordvart variont ed ei ha dau occurrenzas nua ch’ei han priu part cun lur tgauns ed era entginas ch’ei han gudiu senz’il tgaun. Sper giugs e divertiment han ei profitau da dabia trenament sportiv culs tgauns. Gudiu han ils participonts dil
camp a Segnas era l’excursiun d’in di che ha menau els cul tren sil pass dall’Alpsu e da leu vinavon a pei entochen sil Lai da Tuma ni engiuviars a Tschamut e puspei cul tren anavos a Segnas. Tenor Altorfer ei gia il viadi cun tren sil pass staus ina pulita sfida. Sco ella ha declarau, attira in tren occupaus cun biebein 40 teams cun tgaun dabia attenziun. Tscheu e leu seigi denton era stau d’udir in laud che hagi fatg bein.

Cun catschadurs sils fastitgs
A caschun dil percuors da «Canin Cross» che ha menau ils teams da Bugnei a Segnas, han ils affons ils pli sperts cun lur tgauns saviu sequalificar pil campiunadi svizzer. Denter els ei era la participonta Aurora Langhi da Glion sequalificada, la giuvna ha gia priu part pliras ga al campiunadi svizzer da «Canin Cross». In punct culimont dil camp ei tenor Altorfer la viseta dils catschadurs Remo Giger e Clau Maissen stada. Giger ha introduciu ils affons els fatgs dils tgauns da catscha ed el ha era rispundiu in tschuat damondas avon ch’ils affons han astgau suandar siu beagle Nanuka che ha encuretg ils fastitgs da saung. Fastitgs ch’eran vegni mess gia igl avonmiezdi. La ruta culs fastitgs da saung ha simulau igl animal blessau che ha sin sia fuigia schau anavos ils fastitgs. Il spaniel da Münster da Maissen ha allura mussau co el anfla ils fastitgs d’ina runada. Ton affons sco menaders ein stai dil meini che la demonstraziun arisguard ils tgauns da catscha seigi stada in grond enrihament chinologic pil camp da stad. Pils fans da labradors ei secapescha la viseta tiels allevaturs Lozza a Mustér stada ina grond’aventura, leu han ei numnadamein astgau struclar e carsinar ils cagneuls. Il proxim camp per affons e tgauns ha liug dils 19–25 da fenadur 2020 a Segnas.