News-Details

17-08-2019 - Fiasta dil vitg Disentis/Mustér

13.08.2019

Per la secunda ga
Viva Disentis envida alla fiasta dil vitg a Mustér

(anr/hh) Divertiment cun musica e giugs, mo era stans cun products indigens fuorman era uonn la part principala dalla fiasta dil vitg da Mustér. La finamira dils organisaturs dall’uniun Viva Disentis ei era uonn da porscher ina buna caschun da star da cumpignia. Avon dus onns ha Viva Disentis arranschau per l’emprema ga la fiasta dil
vitg ed ell’ei stada in grond success. Glieud da lunsch e da maneivel ha gudiu la gronda purschida. Sonda proxima, ils 17 d’uost 2019 suonda la secunda ediziun da quella fiasta. Ella vegn arranschada sigl areal avon la casa communala dalla Via da Cons siadora entochen e sil plaz avon la casa Puntreis. Il program ch’ils organisaturs porschan ei vasts ed attractivs. Sper ils stans cun products ed artisanadi dalla regiun vegn era offeriu in vast program da rama. Quel cumpeglia demonstraziuns, cant e musica entochen la sera tard. Ina dallas finamiras dils organisaturs ei era da porscher ina sentupada denter indigens e jasters, surtut era possessurs da secundas habitaziuns. La fiasta entscheiva allas 14.00 e cuoza entochen mesanotg. D’udir ein denter auter la musica da tscheiver Las Bagordas e «Giganto & Mattiu». Sco quei che la conorganisatura Larissa Fry di han ils organisaturs era dau uonn preferenza alla participaziun dils indigens cun lur purschida da products indigens, artisanadi e musica ord la Romontschia.