News-Details

Campiunadi svizzer da parasgular a Disentis/Mustér

14.08.2019

Campiunadi svizzer e referats
Campiunadi svizzer da parasgular a Mustér – l’auter onn ei puspei previu in Cup mundial

DA HANS HUONDER / ANR
Dumengia proxima entscheivan ils Campiunadis svizzers da parasgular a Mustér. L’auter onn vegn la regiun probablamein puspei ad esser il liug da concurrenza dil Cup mundial. «Entochen igl october stuein nus sclarir la finanziaziun. Silsuenter decidin nus definitivamein schebein nus organisein l’auter onn in Cup mundial da parasgular», di Marc Demont ch’ei commember dil comite d’organisaziun dil Disentis Open e president dils Surselva Flaigers, l’uniun dils parasguladers dalla Surselva. Mustér organisass aschia per in’ulteriura ga ina gronda concurrenza da parasgular internaziunala cun participaziun dallas meglieras e dils megliers  parasguladers dil mund. Da dumengia entochen sonda da l’autra jamna ei il campiunadi svizzer sil program sisum la Surselva. Denter 100 e 125 parasguladras e parasguladers semesiran a quel, denter els era entgin(a)s concurrent(a)s digl exteriur. Il campiunadi vegn cumbinaus uonn cun in tschuppel referats. «En sesez havess il campiunadi svizzer giu liug uonn a Verbier, mo damai ch’il liug ha renunziau essan nus vegni dumandai d’organisar el. Gia avon havevan nus denton l’idea d’arranschar uonn in cup empau special cun referats, respectivamein ina purschida da perfecziun dils parasguladers. Aschia cumbinein nus ussa quell’idea cul campiunadi svizzer», di Demont.

Sgular e sefatschentar da tecnica e segirtad
L’jamna vegnenta semesiran ils megliers parasguladers dalla Svizra el contuorn da Mustér

DA HANS HUONDER / ANR
Per in’ulteriura ga ha in Campiunadi svizzer da parasgular liug l’jamna vegnenta a Mustér. Uonn vegn el cumbinaus cun referats, drizzai en emprema lingia a parasguladras e parasguladers che vulan seperfecziunar. La part su dalla Surselva ei enconuschenta per sias excellentas cundiziuns da parasgular. «Sche l’aura constat seporschan cheu biars tasks», di Marc Demont. Tasks ei il plaid per pensums, vul dir sgols definai per concurrenzas. Grazia a quellas relaziuns extraordinarias vegn adina puspei arranschau concurrenzas da para sgular el contuorn da Mustér. Ils davos onns ei quei stau denter auter cups mundials ni savens era campiunadis svizzers. «En sesez era Verbier s’annunziaus d’arranschar uonn il campiunadi svizzer. Els han lu denton renunziau e nus essan danovamein vegni dumandai d’organisar quel», di Demont ch’ei commember dil comite d’organisaziun da Disentis Open e president dils Surselva Flaigers che segidan mintg’onn vid l’organisaziun dallas concurenzas a Mustér. Disentis Open ei in’uniun ch’ei vegnida fundada sapientivamein per organisar ils eveniments da parasgular sisum la Surselva. Ils Surselva Flaigers ein aschidadir l’uniun dallas parasguladras e dils parasguladers dalla Surselva. Ella dumbra rodund 50 dels, en tgins era d’ordeifer la regiun. Abstrahau dils indigens che sgolan en Surselva ei il parasgular era in factur turistic: «Nos arranschaments han liug en in temps ch’ils letgs en hotels e habitaziuns ein buc occupai
aschi bein, aschia che nus savein era contribuir enzatgei economicamein alla regiun.»

Concurrenzas e referats
Il campiunadi svizzer dad uonn ha liug dils 18 entochen ils 24 d’uost a Mustér. «Enstagl dil campiunadi svizzer levan nus organisar uonn in ‘Educational Open’. Quei vul dir ina sentupada da parasguladras e parasguladers ch’han interess da seperfecziunar sin ault nivel. La finamira era d’attrer novas parasguladras e novs parasguladers a Mustér, pia sportist(a)s che vulan buc exnum concurrenzar ad in campiunadi», di Demont ch’ei responsabels per l’infrastructura ed il contact tiels gidonters enteifer il comite d’organisaziun. Ussa vegn quell’idea cumbinada cul campiunadi svizzer. «Damai che nus havevan gia fatg ponderaziuns concretas per quella purschida havein nus buca vuliu desister da quella», di Demont. Parallelmein sper il campiunadi svizzer vegn purschiu in tschuppel referats: «Els sefatschentan da tuts secturs dil parasgular naven dils criteris dalla segirtad, trenament mental entochen equipament e sistems e tecnica efficienta da parasgular.» Ils referats vegnan teni d’experts. Aschia vegn il trenader naziunal dils parasguladers Martin Scheel a plidar davart l’efficienza da sgular ni il psicolog Urs Braun davart il sectur mental. Ils referats vegnan teni gest tenor cundiziuns dall’aura duront il di ni lu era la sera.

Mintga di in sgol

Il Campiunadi da parasgular svizzer entscheiva dumengia proxima cun in trenament. Naven da gliendisdis entochen la sonda, ils 24 d’uost ein allura mintga di concurrenzas sil program. Las rutas, vul dir ils tasks, vegnan fixai mintgi di tenor las cundiziuns, respectivamein las prognosas dall’aura. Sil pli tard la sonda ein las victuras ed ils victurs lu enconuschents. Ils organisaturs spetgan denter 100 e 125 concurrentas e concurrents, per part era digl exteriur. Cun Remo Maissen da Rabius ei era in Sursilvan dalla partida a quels campiunadis svizzers. Per garantir in bien andament dallas concurrenzas segidan rodund 35 persunas
duront l’jamna vid l’organisaziun. L’auter onn sa Mustér problablamein puspei arranschar ina concurrenza dil Cup mundial. «Entochen igl october stuein nus sclarir la finanziaziun da quei arranschament internaziunal, vul dir rimnar sponsurs. Lu savein nus definitivamein sche nus savein organisar quei Cup mundial ni buc», declara Demont. Il termin definitiv ei aunc buca fixaus, tenor Demont vegn ei denton ad esser il temps dalla fin fenadur e miez uost. Lu ein las cundiziuns da sgular per ordinari fetg bunas en Surselva e garanteschan aschia interessantas concurrenzas plein tensiun sil pli ault nivel internaziunal da parasgular.