News-Details

Ils salters ein s'entupai a Mustér

09.09.2019

DA HANS HUONDER / ANR
L’Uniun dils salters svizra s’entaupa mintga dus onns alla radunonza generala
cumbinada cun in program da rama.
Uonn ha quei arranschament giu liug a Mustér. Sco quei ch’il salter cantunal Julius Maissen da Mustér di ei il Grischun staus la davosa ga igl onn 1974 il liug da sentupada dall’uniun. Quella dumbra biebein 100 commembras e commembers, seigi salters cantunals sco federals. Rodund in tozzel ein dunnas. 80 participont(a)s Alla scuntrada mintga dus onns ein era las partenarias ed ils partenaris da quels envidai. Alla sentupada a Mustér la sonda e dumengia vargada ein rodund 80 separticipai. Ell’ei vegnida organisada d’in trio: Heidi Nold dalla canzlia cantunala e dils conjugals Helene e Julius Maissen. Julius Maissen ei salter dil cantun Grischun dapi igl onn 1995. L’Uniun dils salters svizra ei vegnida fundada igl onn 1946 sco organisaziun politicamein e confessiunalmein neutrala. Oz ein ils salters cantunals sco era la gronda part dils salters dalla confederaziun organisai en quella. Aschia ei sedau in’uniun sco impurtont
ligiom denter ils cantuns e la confederaziun. Igl intent dall’uniun ei da promover la savida sils pli differents secturs da quella funcziun ufficiala sco era da promover in ornat unit e dil protocol ad arranschaments publics. Medemamein ha l’uniun la finamira da tgirar ils contacts professiunals e persunals denter las commembras ed ils commembers.

Era egl avegnir in salter

En differents cantuns ed era sin plaun federal ei la necessitad dils salters stada ed ei adina puspei in tema da discussiun. «Ei dat cantuns ed era gremis federals ch’ein dil meini ch’ei drovi buca pli ils salters. El cantun Grischun essan nus denton da tut in auter meini», di il vicepresident dalla regenza e cusseglier guvernativ Christian Rathgeb. Per els eis ei clar: «Il salter ei ina tradiziun e persunifichescha il stadi. La populaziun ha plascher da quella funcziun cun identificaziun statala. Il vestgiu cullas colurs dil cantun simbolisescha nies
cantun e dat aschia in tut auter caracter ad in arranschament cun preschientscha dil salter.» Gest el temps dil «New Public Management» seigien tals elements tradiziunals da grond'impurtonza.