News-Details

In onn d’immensa activitad

23.09.2019

(anr/hh) Il venderdis sera han las Pendicularas Mustér SA salvau lur radunonza generala. Ils tschun commembers dil cussegl d’administraziun d’entochen uss ein vegni reeeligi, il possessur dalla maioritad dallas aczias, Marcus Weber, resta president. Malgrad in deficit da bunamein 800 000 francs ha il cussegl d’administraziun mirau anavos alla radunonza da giubileum – igl ei numnadamein stau la 50avla – sin in onn ordvart positiv. En quel ei fetg bia vegniu realisau el contuorn dallas pendicularas e da lezzas sezzas. Ils puncts culminonts ein segiramein stai la construcziun dil Catrina Resort e dalla nova pendiculara da Sedrun sil Cuolm da Vi. Igl unviern vargau ha ina quarta dils appartaments dil resort e 28 letgs el hostel gia saviu vegnir messa a disposiziun als hosps da vacanzas. Parallelmein ei la nova stizun dil Coop vegnida en funcziun sco era il Steakhouse Chevrina ed il restaurant Ursus. Sco quei ch’il cussegl d’administraziun communichescha ei l’occupaziun stada cuntenteivla igl emprem unviern. Ei seigi reussiu da rabitschar surtut dapli hosps dil territori talian a Mustér. Medemamein ei vegniu mess en funcziun igl unviern vargau l’emprema etappa dils indrezs d’ennevar. Sco quei che Marcus Weber ha communicau il venderdis sera ha la realisaziun dalla pendiculara da Sedrun sil Cuolm da Vi custau rodund quater milliuns francs dapli che budgetau ed era ils cuosts pils indrezs d’ennevar ein stai per rodund in milliun francs pli aults.

Casa da parcar
Egl onn da fatschenta passau croda era la fundaziun dalla Andermatt-Sedrun-Disentis Marketing AG. Quella societad per 65 pertschien en possess dallas Pendicularas da sport Andermatt-Sedrun e per 35 pertschien els mauns dallas Pendicularas Mustér SA seigi stada urgentamein necessaria. Las organisaziuns da turissem el liug hagien buca realisau ils segns dil temps ed hagien era buc accelerau la commercialisaziun professiunala dalla regiun sin plaun naziunal ed internaziunal, scriva il cussegl d’administraziun el rapport annual. El decuors digl onn seigi la collaboraziun cun Sedrun Mustér Turissem denton semigliurada. Cheutras seigi ei pusseivel d’investar meglier ils daners dallas taxas da turissem. Aunc pli grondas difficultads seigien da constatar ella collaboraziun da l’autra vart dil cuolm cun Andermatt Turissem. Igl onn vegnent prevedan las Pendicularas Mustér SA d’ereger ina nova casa parcar cun 400 parcadis. La lubientscha da baghegiar persuenter ei aunc buc avon maun aschibein sco quella per ereger il restaurant da panorama sil Cuolm da Vi.

Quen siara cun deficit
Il quen da menaschi dallas Pendicularas Mustér SA pigl onn da fatschenta 2018/19 siara cun in deficit da 792 000 francs. Cun biebein 7,8 milliuns francs ein las entradas stadas per rodund 2,5 milliuns francs pli aultas. Tenor il quen ein las entradas ella hotellaria e la gastronomia carschidas dad 1,5 sin 3,6 milliuns francs. S’augmentadas ein perencunter era las expensas. Ils cuosts ein stai en connex cun la restructuraziun e novaziuns enteifer il menaschi.