News-Details

Pcd dil cumin dalla Cadi a Mustér

25.09.2019

(cp) Sonda, ils 21 da settember 2019 ha la Partida cristiandemocratica (pcd) dalla Cadi envidau ad in’occurrenza el Resort Catrina a Mustér. Marcus Weber, investur e possessur, ha presentau oreifer siu resort. Il tema dil podi seclamava: «Resorts – spindrament dil turissem ni fin dils hotels?». Igl anteriur deputau Placi Berther ha menau e moderau la discussiun. Da quella han fatg part candidats e candidatas dalla pcd grischuna per il parlament federal, numnadamein: cuss. dils stans Stefan Engler, cuss. naz. Martin Candinas, deputada e presidenta communala dad Ilanz/Glion Carmelia Maissen, deputau e president da Gastro Grischun Franz Sepp Caluori, la meinagestiun dad ITG Yvonne Brigger-Vogel e deputau e meinafatschenta da Surselva Turissem Kevin Brunold. Resumond san ins dir che nossa regiun perifera ha il cletg dad haver investurs che creian ed investeschan en quella, augmentond aschia la plivalur per quella. Resorts ein impurtonts. Els portan pernottaziuns e hosps, pia la massa. Mo ins astga denton buc emblidar ils hotels indigens. Els dattan la tempra locala, ein impurtonts purtaders da prestaziuns e cumpleteschan aschia fetg bein ils resorts. Plinavon duess era il maun public far el futur dapli ponderaziuns co ed en tgei fuorma ch’el sa gidar e sustener la hotellaria indigena. Suenter la discussiun da podi ha cuss. guv. Marcus Caduff aunc dau entgins plaids sin via. El ha puntuau che la collaboraziun ella regiun seigi fetg impurtonta e ch’ei drovi egl avegnir ina strategia communabla. Presents fuvan era entgins candidats dalla giuvna pcd grischuna per Berna: Sarina Caduff, Fabian Collenberg ed Anton Capaul. Suenter l’occurrenza han ins saviu prender investa dil resort, guder in aperitiv e dar ina paterlada cun las candidatas ed ils candidats per Berna.