News-Details

26 giuvenils han fuffergnau tier la Distec

27.11.2019

(anr/hh) 26 scolaras e scolars da pliras vischnaunas han nezegiau la caschun d’emprender d’enconuscher empau pli detagliadamein la Distec SA a Mustér. Els han fatg quei al di digl
avegnir miez november.
Al di digl avegnir vegn purschiu a giuvenils la pusseivladad da tschentar plaun a plaun ils binaris per la veta professiunala. Biars da quels han il desideri da restar ella regiun suenter la scola obligatoria e per quei motiv eis ei impurtont ch’els emprendien d’enconuscher las pusseivladads d’emprendissadi e scolaziun che seporschan ella vischinonza. Dapi biars onns porscha la Distec SA a Mustér la pusseivladad als giuvenils da visitar il menaschi quei di. Cun 26 scolaras e scolars ei igl interess persuenter staus gronds uonn. Ils giuvenils dalla tschunavla e sisavla classa ein arrivai dallas vischnauncas da Mustér, Tujetsch e Lumnezia. Ella moderna partiziun dils emprendists han els saviu far enconuschientscha cullas clamadas dil polimecanist ed il mecanist da produc ziun. Parallelmein han els era giu la caschun da far emprems pass pratics en quellas professiuns. Ensemen culs em prendists dalla Distec SA han els luvrau vid differentas maschinas. Il resultat da quella lavur ein differents utenils stai ch’els han silsuenter saviu prender la sera a casa.

Pliras professiuns

Entgins scolars han era priu investa dalla partiziun dalla preparaziun dallas lavurs ed han aschia empriu d’enconuscher ulteriuras interessantas professiuns. Giuvnas e giuvens ch’absolvan cun success igl emprendissadi sco polimecanist(a) han biaras pusseivladads da sescolar silsuenter. Igl ei ina clamada che porscha bunas caschuns da s’avanzar professiunalmein. La movitaziun ed il grond interess dallas scolaras e dils scolars han fascinau ils emprendists e collaboraturs dalla Distec SA. La Distec SA porscha plazzas d’emprendissadi sco polimecanist e mecanist da producziun sco era igl emprendissadi mercantil. La scolaziun e formaziun succedan en in dils pli moderns luvratoris per emprendists dalla regiun. El porscha ina capacitad da scolaziun da 20 emprendist( a)s. Sper il di digl avegnir seporschan mintg’onn ulteriuras caschuns d’emprender
d’enconuscher las differentas professiuns dalla Distec SA.

Menaschi top modern
La Distec SA a Mustér ei in menaschi che lavura cun aulta qualitad e precisiun. La paletta sil sectur dall’elavuraziun da metal ei fetg gronda. Leutier s’audan era la montascha da gruppas da construcziun e la producziun da cumponentas, la producziun da tocca resgiada cun CNC sco
era la producziun da prototips e serias pintgas. Sper la lavur cun materia usitada sco itschal ed alumini elavura la Distec SA era material d’aulta qualitad sco invar e titan. Per l’elavuraziun da quels materials stat in parc da maschinas modern e precis a disposiziun. La Distec SA gauda in excellent num internaziunal per siu ault standard da qualitad. Ses products sil sectur dall’industria da space ed aviatica, tecnica da labor e da medischina, optica, sensorica, industria d’IT, construcziun da maschinas ed apparats en general e fuormas ein bein enconuschents.