News-Details

Mustér

28.11.2019

(anr/hh) All’entrada ella casa Puntreis a Mustér sesanfla dapi cuort in defibrillatur niev. El ei vegnius finanziaus dall’Uniun samaritana Mustér. Sco quei ch’il presdient dall’uniun, Baseli Jacomet, di dat ei a Mustér plirs defibrillaturs: «Ils biars ein denton buca contonschibels duront 24 uras, cun excepziun da quel alla staziun dalla viafier.» Quel cheu stat a disposiziun duront igl entir temps e sesanfla ultra da quei en in liug central. «El contuorn da Puntreis – per exempel sigl areal da scola – vegn organisau igl entir onn ora arranschaments, mo era schiglioc circulescha fetg bia glieud el liug cun casa da scola e baselgia. Per quei motiv eis ei necessari d’haver cheu el center ina tal’apparatura», di Jacomet che presidiescha l’uniun dapi treis onns. Il defibrillatur ha custau rodund 2200 francs. L’uniun procura era il manteniment digl apparat, per exempel il replazzament da battarias ni electrodas. Davart dalla casa Puntreis ein ins engrazieivels per quell’investiziun. «El ei era d’engrau per nos collaboraturs. Nus havein tuttina rodund 90 persunas che lavuran cheu ed ei sa era capitar ina ga enzatgei cun in da nus. Per la casa sezza ei in defibrillatur buc in’obligaziun», di il meinafatschenta da Puntreis, Diego Deplazes. Il persunal duei vegnir scolaus pil cass urgent per aschia saver metter en funcziun igl apparat tenor basegns. «Il diever ei fetg sempels. Cura ch’il defibrillatur ei tschentaus en di quel tgei ch’ei da far. Da principi san ins far nuot falliu», di Jacomet. La casa Puntreis hagi purschiu maun per plazzar quei apparat el liug. Tenor Deplazes havessien ins eventualmein fatg sezs ponderaziuns da cumprar in tal. Per ses engaschaments en seracass dispona l’Uniun samaritana Mustér dil reminent sezza aunc d’in defibrillatur, plinavon da plirs pigl exercezi. La scaffa cul defibrillatur ei equipada cun in alarm.