News-Details

L’UCP Mustér va ell’offensiva

28.11.2019

L’UCP Mustér va ell’offensiva

(hh/anr) L’Uniun da commerci e professiun Mustér ha lantschau in tschuppel activitads. D’ina vart pertuccan ellas il temps d’advent, da l’autra vart la problematica da cattar emprendistas ed emprendists. Quei problem ei daventaus gronds ils davos onns suenter ch’il diember da naschientschas ei sereducius cuntinuadamein. La munconza da vegnentssuenter vegn constatada surtut en differentas professiuns da mistergner. Per empruar da dar il damogn a quella problematica ha ina gruppa da lavur installada dall’UCP sviluppau in program da promoziun. Quel cumpeglia denter auter seras d’orientaziun pils giuvenils. Quater han liug la primavera vegnenta. Las fa tschentas a Mustér embelleschan danovamein il temps d’advent e da Nadal cun pigneuls. Quell’acziun che duei far il vitg pli attractivs vegn organisada per la secunda ga. Plinavon vegn purschiu cuort avon Nadal ina vendita dalla sera ed in transparent sur la via duei sensibilisar la glieud da far cumissiuns el vitg.

In tschuppel activitads per la fin digl onn
L’Uniun da commerci e professiun Mustér fa attenta la glieud silla purschida el liug

DA HANS HUONDER / ANR
Las fatschentas ella periferia vegnan pli e pli sut las rodas dil commerci els centers e via internet. Quels che s’engaschan buc ed ein buc  innovativs han grev da subsister. Cun differentas acziuns emprova l’Uniun da commerci e professiun Mustér d’animar la glieud da far las cumpras el vitg. L’EX ei bein la pli gronda ed impurtonta occurrenza che l’UCP Mustér organisescha. Mintga quater onns attira quella fetg bia glieud a Mustér ed ei in’excellenta plattafuorma da propaganda per las fatschentas ed interpresas dalla regiun. Tier siu engaschament s’audan denton era acziuns pli pintgas e da quellas ha l’uniun arranschau uonn ed en special quest atun entginas. La stad vargada ei il magazin «Nus vivin nies Disentis/Mustér» cumparius per la secunda ga ed en connex cun quel ei vegniu organisau ina concurrenza. Ei ha giu num dumbrar las Mustinas – il maletg dalla vacca da plesch. Sco premis ha l’UCP mess a disposiziun treis bons da cumpra da mintgamai 50 francs. Dacuort ein ils victurs vegni erui. Treis cedels ein vegni tratgs ord la capitala. Gudignau quels bons han Janine Linse da Segnas, Thomas Rimann da Rütihof ed Anton Duhacek da Steinhausen.

Pigneuls e vendita dalla sera

Per la secunda ga suenter 2018 embelleschan pigneuls avon las fatschentas il vitg. La finamira da quell’acziun ei da dar tempra da Nadal ed aschia da far il vitg, respectivamein ils plazs avon las fatschentas, pli attractivs. Uonn separticipeschan 23 menaschis a quell’acziun, tut en tut ein rodund 30 pigneuls ornai. Ensemen culs pigneuls gronds dalla vischnaunca dattan els ina biala atmosfera. In’ulteriur’acziun instradada quest atun ei il transparent sur la via cantunala all’entrada el vitg. Per plidentar en emprema lingia ils jasters vegn appellau alla solidaritad cun las fatschentas el vitg: «Mo communablamein essan nus ferms. Cumprar en el vitg – mantener fatschentas.» Ils exponents dall’UCP Mustér cul president Edgar Durschei alla testa speran che quei appel vegni la finfinala era vivius. Ils 20 da december 2019 vegn arranschau ina vendita dalla sera entochen allas 20.00. Suenter quella vegn purschiu la caschun da star da cumpignia el center dil vitg e da prender in sitg. La musicista Fiona Cavegn vegn a procurar per divertiment musical.

Promover plazzas d’emprendissadi

In problem pli e pli grond ei la munconza che regia dapi entgins onns enten anflar nov(a)s emprendist(a)s, en special per differentas professiuns da mistergner. Per empruar da sensibilisar ed informar meglier ils giuvenils davart la purschida da plazzas d’emprendissadi ella regiun ha l’Uniun da commerci e professiun Mustér installau ina gruppa da lavur cun representants da differentas interpresas ed instituziuns. Il matg vegnent vegn arranschau quater seras d’orientaziun davart in tschuppel professiuns naven digl electroinstallatur, il miradur entochen il specialist da tgira ed il commerciant. Quellas orientaziuns han liug en differentas vischnauncas. Cun quella caschun han las interpresas participadas la pusseivladad da sepresentar e cunzun era d’empustir impurtonts contacts cun giuvnas e giuvens alla tscherca d’ina plazza d’emprendissadi.

Ulteriuras informaziuns ein cattar sin
www.ucp-disentis.ch