News-Details

In tschuppel demissiuns

02.07.2020

Da Hans Huonder/FMR

La gliesta dallas demissiuns dils mandataris politics a Mustér ei liunga. Sper il president communal ed in gerau ha bunamein la mesadad dil cussegl da vischnaunca demissiunau. Medemamein l’entira cumissiun da gestiun. Ils 27 da settember 2020 elegia il suveran da Mustér il cussegl da vischnaunca, la suprastonza communala, la cumissiun da gestiun ed il cussegl da scola. Da tscharner ein lu las representantas ed ils representants politics per ils proxims quater onns. L’jamna vargada ei il termin da demissiun spiraus. Entochen ils 28 d’uost 2020 han vischinadis, partidas politicas localas ni gruppas da silmeins 15 votantas e votants la pusseivladad da proponer candidatas e candidats. Emprems candidats ein gia enconuschents. Sco quei che la presidenta dalla cumissiun preparatoria per las elecziuns da quest atun, Rita Huonder-Tenner, ha detg sin damonda dalla FMR ein pliras persunas gia sedeclaradas promtas da star a disposiziun: «Mirau sur tut ora havein nus gia uss ina buna situaziun cun candidatas e candidats novs. Empau mal il venter fa la tscherca d’in(a) candidat(a) per la suprastonza communala.

Alla tscherca d’in gerau
Essend che la perioda d’uffeci pils gremis politics a Mustér cuoza quater onns ein las midadas el rom dallas elecziuns lu era pli grondas che leu nua che periodas d’uffeci cuozan treis ni sco pli baul savens mo dus onns. Dalla suprastonza communala seretilan il president communal Robert Cajacob ed il gerau Victor Flepp. Omisdus ein stai en uffeci ina perioda d’uffeci. Pil presidi communal dat ei gia in emprem candidat. Gia avon in temps ha René Epp annunziau siu interess per quei post. «Pil post vacant da gerau havein nus aunc negin candidat», di Huonder. Vinavon a disposiziun per l’executiva communala stattan Clemens Berther, Wendelin Jacomet ed Jris Lombris. Ferton che Berther e Lombris sesan dapi quater onns ella suprastonza communala ei Jacomet vegnius eligius avon dus onns. Demissiunau cumpleinamein ha la cumissiun da gestiun. Da quella seretilan Manfred Caviezel, Beat Hosang e Toni Huonder. «Per la cumissiun da gestiun havein nus gia dus candidats, cun in tierz essan nus en discussiun», declara Rita Huonder. La schanza ch’ins sappi la finfinala presentar treis candidats valabels al pievel seigi gronda.

Siat da 15 calan
Relativamein liunga ei la gliesta dallas demissiuns tiel cussegl da vischnaunca. Abdicau han Christoph Berger, Stefan Columberg, Anna Maria Genelin, Rita Huonder-Tenner, Admir Jasarevic, Christian Loretz e Livio Zanetti. Vinavon a disposiziun stattan Armin Berther, Adrian Deflorin, Edgar Durschei, Mario Flepp, Giusep Lozza, Armin Manetsch, Helga Probst-Linder e Martino Sabbadini. Tenor Rita Huonder dat ei gia dus candidats novs pil cussegl da vischnaunca: «Cun ulteriurs essan nus en discussiun, ei vesa ora bein.» Dil cussegl da scola seretilan Gion Battesta Manetsch e Giusep Simonet, ferton che Simon Bergamin e Manuela Venzin-Zazzi stattan a disposiziun per ina reelecziun. «Era pil cussegl da scola havein nus gia dus candidats novs. Pil cussegl da scola eis ei per ordinari buc aschi problematic d’anflar glieud», di Rita Huonder sin damonda dalla FMR.

Slontsch giuvenil

«Il fatg che nus havein cun René Epp ina persuna relativamein giuvna che candidescha pil presidi communal dat empau slontsch als giuvens da s’engaschar. Igl ei lu era impurtont che nos gremis politics vegnien regiuvinai», di Rita Huonder-Tenner che seretila medemamein dil cussegl da vischnaunca e quei suenter haver apparteniu a quel ils davos 15 onns. Era ella vegli far plaz ad ina persuna giuvna. La balla ei ussa tiels vischinadis, las partidas politicas localas e las uniuns. La cumissiun preparatoria ha en quei senn ina funcziun coordinativa. Las nominaziuns ston succeder sin via ufficiala e quellas vegnan a succeder il proxim temps.