In’emprema badelada daditg desiderada

Hans Huonder/FMR

La sentupada la gievgia suentermiezdi per far l’emprema badelada dalla punt pendenta a Mustér ei stada in mument daditg desiderau dils iniziants dalla «Pendenta». Suenter in temps intensiv da rimnar daners e preparativas san las lavurs da construcziun entscheiver. «Per mei persunalmein ei quei in mument fetg emoziunal. Sis onns essan nus vid quei project ed ussa savein nus finalmein entscheiver.» Quei ha il president dall’Uniun la Pendenta, Christian Loretz , detg el liug dall’emprema badelada a S. Gada. Pils inschigniers e las interpresas da bahegiar entscheivi in temps plein tensiun: «La construcziun da quella punt ei tecnicamein fetg pretensiusa.» Il president communal René Epp ha sutlingiau la perseveronza endinada dils iniziants: «In tal engaschament ei exemplarics.»

La pli liunga dil Grischun

Cun 270 meters ei la punt pendenta da S. Gada entochen sut il vitg da Mumpé Medel la pli liunga dil Grischun. Il pli ault punct ei 95 meters sul Reinanteriur. Purtaus vegn igl entir construct da sis sugas cun in diameter da mintgamai 45 mm. Dils cuosts totals da rodund dus milliuns francs vegn la mesadad purtada da donaziuns da privats. Christian Loretz ha cumparegliau quei project cullas pendicularas: «Ei dat differentas parallelas, denter auter las sugas, l’altezia ni lu era la plivalur dad omisduas.» La parallela ha el fatg pil motiv che Marcus Weber e las Pendicularas Mustér SA sustegnan il project cun 390 000 francs.

A fin il november

Suenter las lavurs vid ils fundaments dad omisduas varts dalla val succeda la construcziun dalla punt naven digl uost. Il november duess ella esser finida. «Quella punt vegn ad enrihir la purschida dalla regiun. Ella duei denton era esser in simbol per ina buna collaboraziun dall’Uniun la Pendenta culla vischnaunca e las pendicularas», puntuescha René Epp. La punt procuri buca mo per ina colligiaziun da S. Gada cun Mumpé Medel, mobein sesanfli era el contuorn cul project da Caschlatsch ni il museum dall’armada sut Mumpé Medel.