Cassa da cumpensaziun

Cassa da cumpensaziun

La cassa da cumpensaziun Disentis/Mustér ei il punct da colligiaziun denter igl assicurau e la cassa da cumpensaziun dil cantun. Nus informein e cussegliein Vus bugen al spurtegl dall'administraziun communala tier suandontas damondas:


AVS (Assicuranza per vegls e survivents)

L'AVS ei la pli impurtonta pétga dil provediment per vegls e survivents en Svizra (1. pétga). Ella duei cuvierer ils basegns d'existenza en la vegliadetgna ni el cass dalla mort. Sco assicuranza dil pievel ei la AVS obligatoria per tuts.


AI (Assicuranza d'invalids)

Las persunas che retscheivan quest agid secumponan ord persunas ch'ein invalidas sin fundament d'impediments da naschientscha, malsogna ni accident. Igl intent dalla AI ei la integraziun da questas persunas en la veta da mistregn ni en ina sparta (p.ex. percasa, scolaziun) mess a pèr cun il mistregn.


PS (Prestaziuns supplementaras)

Las prestaziuns supplementaras tier la AVS/AI gidan leu, nua che las rentas e las entradas cuvieran buca ils cuosts da viver minimals. Las prestaziuns supplementaras ein in dretg giuridic e buca in agid social. En cumbinaziun cun la AVS ed AI s'audan las prestaziuns supplementaras tiel fundament social da nies stadi.


SF (Supplements da Famiglia)

L'alingiaziun da supplements da famiglia ha ina ulivaziun dils cuosts da famiglia per intent. Ils SF cantunals als luvrers cumprendan supplements d'affons, supplements da scolaziun e naschientscha, daners d'educaziun sco era contribuziuns alla canorta d'affons.


CGM (Cumpensaziun dil gudogn entras il survetsch militar)

Persunas che prestan survetsch militar, schurmetg ni survetsch civil, paga la CGM ina cumpart vid il deficit da paga.


AD (Assicuranza da disoccupai)

La AD cuviera la resca da disoccupaziun. Plinavon gida ella da cumbatter la disoccupaziun entras mesiras da lavur (cuors, occupaziun temporara, practicums, contribuziuns d'educaziun e contribuziuns d'introducziun).


Reducziun individuala da premias (IPV)

Persunas e famiglias che vivan en semplas relaziuns economicas san sut specialas cundiziuns dumandar per contribuziuns vid las premias dalla cassa da malsauns obligatoria (KVG).

Annunzia
L'annunzia ei d'emplenir ora cumpletamein, da suttascriver e d'inoltrar ils documents necessaris al spurtegl dall'administraziun communala.

Termin d'annunzia
L'annunzia sa vegnir fatga duront igl entir onn. Il dretg ei piars sche la damonda per igl onn 2013 ei buca inoltraus entochen ils 31.12.2013

Formular
Il formular per l'annunzia sco era ulteriuras informaziuns pertuccont l'IPV anfleis Vus cheu.


Igl institut d'assicuranza sociala dil cantun Grischun porscha online informaziuns detagliadas tier tut ils survetschs. Plinavon anfleis Vus numerus formulars online.