News-Details

«Gia la historia dil gimnasi ei fascinonta»

07.02.2017

La fin digl onn passau ha Bruno Hensler bandunau il gimnasi dalla claustra a Mustér e dapi l’entschatta digl onn ei la funcziun da rectur els mauns da Roman Walker. Sia finamira ei da tener il diember da scolars, garantir la qualitad dall’instrucziun e procurar ch’il gimnasi seigi purtabels era egl avegnir per la claustra. Hensler ha tgamunau la scola media a Mustér tschun onns e miez. En quei temps ei il gimnasi curdaus si cun differentas novaziuns. Denter auter ein ins sedecidius da serender egl exteriur e d’acquirir leu novs scolars. Cun quella strategia vul il niev rectur cuntinuar. «Nus essan ussa gest
stai ell’Africa dil sid ed havein visitau leu differentas scolas. Sis studentas e studentsvegnan la primavera en Svizra per separticipar alla turnea dil chor dil gimnasi», di Walker. Quei ei aschidadir in fuffergnadi, pertgei la finamira ei da dar era a giuvenils dall’Africa dil sid la pusseivladad da frequentar il gimnasi dalla claustra a Mustér.

Nus stuein esser realistics
Dapresent visetan otg giuvnas ni giuvens dalla China la scola media a Mustér. «Il mument seconcentrein nus sin quellas duas tiaras. Ei dess franc aunc autras nua che la formaziun ademplescha buc ils basegns dalla populaziun. Per mei eis ei impurtont che las persunas che vegnan a studegiar a Mustér hagien il connex cultural. Ei ha num seviver en cheu per sesentir bein. Nus stuein denton era veser ch’ei pretenda bia temps d’acquirir scolars egl exteriur», puntuescha Walker. El constatescha ch’igl interess da giuvnas e giuvens dil Tessin e d’Ursera ei pli e pli era avon maun da vegnir el gimnasi a Mustér: «Per nus eis ei secapescha pli sempel sche giuvnas e giuvens da cantunsvischinonts vulan frequentar nossa scola.» Aschia ni aschia ha il gimnasi la finamira da procurar che la cumpart da scolaras e scolars da mintga autra tiara astgi buca survargar mintgamai diesch pertschien. La maioritad dils gimnasiasts duei haver ragischs cristianas. La finamira ein diesch entochen vegn scolaras e scolars dapli digl exteriur. Walker ei denton realistics pertuccont la finamira da carmalar scolaras e scolars digl exteriur a Mustér e sa ch’ei dat cunfins en quei grau.

In sacados plein savida
Walker ei carschius si a Laufenburg e S. Gagl. A Zug ha el frequentau il seminari da scolasts. Suenter haver dau scola entgins onns ora silla tiara ha el absolviu in studi da musica. El dispona dil certificat sco menader da scola dil scalem secundar II dall’Universitad S. Gagl sco era dil «master of arts» en pedagogia da musica culs roms principals en musica da scola, direcziun da chor, musica sacrala e pedagogia vocala. El ei staus magister per musica e dirigent al gimnasi dalla claustra benedictina ad Engelberg. Da 2012 entochen 2015 ha el menau il gimnasi ed internat S. Antoni ad Appenzell: «Jeu haiel tschercau ina nova sfida e damai ch’jeu haiel gia fatg experientschas cun in gimnasi d’ina claustra benedictina ha quella funcziun cheu a Mustér interessau mei. Il gimnasi dalla claustra ha in fundament historic fascinont, igl ei buca semplamein ina scola cantunala sco biaras autras.» La finfinala ha aunc in auter argument menau el sisum la Surselva: «Nus essan oriunds dalla part su dil Valleis, medemamein ina regiun cun cuolms. Las muntognas fascineschan mei.» Sia funcziun sco tala ei cumbinada cun grondas sfidas. Quellas seconfrunta Walker cun ina tenuta aviarta: «Jeu astgel sligiar cheu problems, mo era ademplir pensums sco per exempel serender egl exteriur per tschercar scolaras e scolars. Per mei ei quei negin stuer.»

Ina damonda economica

«Ina da mias incumbensas ei da segirar la scola pigl avegnir, vul dir procurar che quella seigi purtabla per la claustra. En quei senn ei mia incumbensa era ina sfida economica», di Walker sin la damonda tgei pensums ch’el taxeschi pils pli impurtonts. Il mument ha il gimnasi rodund 180 scolaras e scolars, 200 fuss giavischeivel: «Nus stuein esser realistics ed empruar da far il meglier pusseivel cul diember che nus havein ussa.» Parallelmein cun quella sfida va era l’incumbensa da segirar la buna qualitad dalla scola. Sil sectur pedagogic vesa Walker potenzial tier la musica, mo era il sport. «La musica vocala ha tier nus gia fetg gronda impurtonza. Il sport savess esser in’ulteriura petga damai che nus havein fetg buna infrastructura persuenter», di il bab da quater affons ella vegliadetgna denter sis e quendisch onns. Ina buna qualitad dall’instrucziun ei cumbinada cun magisters motivai e qualificai. Quels ha il gimnasi a Mustér apparentamein buca difficultads d’anflar: «Nus havein adina puspei fetg bunas annunzias per nossas plazzas vacantas. Ei dat glieud che tscherca in contuorn inspiront per la professiun.» Il gimnasi dalla claustra da Mustér vegn menaus d’ina direcziun da scola. A quella appartegnan sper Walker era il decan pader Bruno Rieder sco prorectur, Tom Etter sco menader dil sectur gimnasi e Hans Müller sco menader dil sectur digl internat.