News-Details

Da tats e tattas, pendiculara e la mort dallas vischnauncas

27.02.2017

Cul til atras il vitg ei il punct culminont dil tscheiver a Mustér vegnius contonschius la sonda suentermiezdi. La cuntinuaziun dil tscheiver ei oz cul til pils affons e la Dertgira nauscha. Ils numerus aspectaturs agl ur dalla via han gudiu la sonda in bi til cun interessants sujets.

Bunamein ina tiarza dallas 28 gruppas – numnadamein otg – eran
musicas da tscheiver. Sper las formaziuns dalla regiun ei quei era stau guggas dalla Bassa: Bienna, Basilea ed Urdorf. Las guggas ein ina part essenziala d’in til da tscheiver. Ellas porschan buca mo bials motivs, mobein procuran era per ina bun’atmosfera. Ensemen cun la bellezi’aura dalla sonda vargada ei quei stau ina cumbinaziun perfetga. Mo era las ulteriuras
gruppas han contribuiu al bein reussir da quei suentermiezdi da tscheiver. Gruppas d’affons pigns, scolarets e classas dalla primara da Mustér e Medel han embelliu il til cun bials sujets. Davos quels sezuppa fetg bia lavur e carezia pil detagl. Aschia ein ils affons sepresentai
denter auter sco tats e tattas, Robin Hood e Lady Marianne, Olaf e la princessa da glatsch, ils Legos, Alice im Wunderland ni era Nemo e Dorie. Mo era il resort Catrina ed ils Pokemons ein stai da veser aschi bein sco ils Quadrels da cletg, ils Stabilos ed Aldo ed Andrietta culs dus
pigns. Las gruppas da carschi han era giu uonn in’arma principala: Ils confettis. Da quels ei vegniu fatg diever stediamein. Ils Royals, ils Frabiziechels, la banda da stiarls, ils amitgs dil tscheiver da Trun e l’Uniun da giuventetgna Trun han cumpletau il til cun lur sujets, denter
auter la sepultura dallas vischnauncas. Ina fusiun fussi numnadamein la mort da quellas. Sut la marella ei era la zona serrada dalla Val Strem a Tujetsch vegnida. La Societad da musica Mustér ha fatg attents sin sia uniformaziun nova ed ina gruppa ha propagau ils dis da schlaghers a Sedrun. Il tscheiver a Mustér cuntinuescha oz. Naven dallas 13.30 ha il til da tscheiver dils affons cun partenza sper la halla Cons liug. La sera s’auda allura cumpleinamein alla Dertgira nauscha. Naven dallas 20.00 publichescha quella sias sentenzias sin plaz scola. Dalla partida ein era las musicas da tscheiver Bagordas, Fifferlottas e Vagabunds.

Las fotografias dil til da tscheiver anfleis Vus cheu.