News-Details

Prest entscheivan las lavurs

16.03.2017

Il project dil Resort Catrina sper la staziun da val dallas Pendicularas Mustér SA ei cuort avon la realisaziun. Cun el survegn la regiun biebein 700 letgs novs per hosps da vacanzas. Sco quei ch’il directur dallas Pendicularas Mustér SA, Ruedi Büchi, ha detg sin damonda dall’Agentura da novitads rumantscha,
eis ei previu d’entscheiver cun las lavurs da baghegiar l’entschatta avrel. L’emprema etappa cun quater da sis casas cun habitaziuns da vacanzas duei vegnir terminada entochen l’entschatta dalla stagiun 2018/19, la secunda etappa cun duas ulteriuras casas rodund in onn pli tard. Tut en tut preveda il project 142 habitaziuns administradas sco era 28 combras en hostel, spa, ustria, localitads per stizuns e da menaschi. Enconuschent eis ei gia ch’il
Coop vegn a retrer leu novas localitads. Gest dasperas sesanflan ulteriuras
localitads da fatschenta che vegnan aunc affittadas. Ils cuosts per quei resort niev realisaus dalla Catrina Resort SA ein calculai cun rodund 60 milliuns
francs. Cun quei resort cun biebein 700 letgs vul igl investur Marcus Weber dar niev slontsch al turissem e generar ulteriuras impurtontas entradas per las Pendicularas Mustér SA. Ils davos onns ei il diember da letgs per hosps da
vacanzas sereducius marcantamein a Mustér. Quels hosps han allura era muncau allas pendicularas. Medemamein duei il turissem da stad vegnir vivificaus. Ulteriurs elements digl entir project da svilup che Weber intenda
da realisar ein indrezs d’ennevar el territori da skis Caischavedra Péz Ault e la pendiculara nova da Sedrun el territori da skis a Mustér.