News-Details

Ponderaziuns davart sanaziun e cumpletaziun

24.03.2017

Il Center da sport e cultura a Mustér ha da basegns d’ina sanaziun. Parallelmein sper la calculaziun da quella vul la vischnaunca denton era far ponderaziuns co adattar la purschida. Persuenter damonda la suprastonza communala uss il cussegl da vischnaunca per in credit da projectaziun da 375 000 francs. Igl onn 1980 ei la part principala dil Center da sport e cultura a Mustér vegnida baghegiada, numnadamein la halla plurivalenta, la halla da tennis e la cafetaria. Tredisch onns pli tard ei suandada l’engrondaziun dil center cun la plazza da ballapei e la plazza da glatsch sco era la Sala Fontauna cun in plaz dir sco tetg ed il post da commando. Sco quei che la suprastonza communala constatescha en siu messadi per mauns dalla seduta dil cussegl da vischnaunca da questa sera ademplescha il Center da sport e cultura in’impurtonta funcziun en favur dalla populaziun indigena, mo era dils hosps da vacanzas. El decuors dils davos onns han las frequenzas dil center saviu vegnir augmentadas successivamein, buc il davos era sin fundament da nova purschida. Bein frequentadas ein era las localitads da dormitori per gruppas e camps che genereschan biaras pernottaziuns. Il mument porscha il center 630 pertschien plazzas da lavur.

Sanaziun ei necessaria
Las davosas jamnas ei la suprastonza communala sefatschentada da rudien dil Center da sport e cultura ed ha decidiu d’instradar las mesiras necessarias per la projectaziun d’ina sanaziun ed ina adattaziun dil center. Per quei motiv ha ella buca mo installau ina cumissiun da baghegiar, mobein era surdau l’incarica per la projectaziun ad in biro. Alla cumissiuned al biro d’architectura stattan differents rapports dils davos onns davart il Center da sport e cultura a disposiziun. Aschia ei il baghetg gia vegnius giudicaus ina ga en in rapport. Leutier vegnan ponderaziuns davart l’energia ed ina proposta per ina sanaziun. Medemamein exista gia ina lavur davart il program da spazi e la stad vargada ha l’interpresa Erlebnisplan fatg ponderaziuns davart in auter nez dil spazi avon maun. Quei rapport ei vegnius pretendius dil cantun sin fundament d’eventualas contribuziuns finanzialas da sia vart en favur dil center. Plinavon ei la Scol’aulta per turissem ed economia a Cuera vegnida incaricada da sclarir entginas damondas en connex cul program da spazi. Cumissiun e biro d’architectura han buca mo l’incumbensa da far ponderaziuns davart la sanaziun dall’infrastructura existenta, mobein era concernent la purschida ch’exista, respectivamein che savess vegnir adattada ni cumpletada.

In center attractiv
«Cun la sanaziun dil Center da sport e cultura lein nus – sper il manteniment indispensabel dalla substanza dil baghetg – augmentar la purschida ed attractivitad digl edifeci senza stuer caschunar in augment considerabel dils cuosts da menaschi egl avegnir. Quei pretenda in concept fetg effectiv ed efficient. Quei vegn segir buc ad esser pusseivel senza cumpromiss», scriva la suprastonza communala el messadi. Per la projectaziun damonda la suprastonza communala il cussegl da vischnaunca per in credit da 375 000 francs. Avon biebein dus onns haveva il cussegl da vischnaunca gia concediu in credit persuenter da 185 000 francs. Da quel ein sulettamein 35 000 francs vegni duvrai pil rapport dad Erlebnisplan. Il credit restont duei vegnir abolius en quei connex. A sia seduta da questa sera sefatschenta il cussegl da vischnaunca da Mustér plinavon dalla cumpra da terren per promover l’economia ella zona da mistregn Pignola/Marias sco era dalla revisiun parziala dil regulativ pil persunal communal. En connex cun quei regulativ eis ei previu da crear supplementarmein ina plazza da 100 pertschien pigl uffeci da baghegiar e survetschs tecnics, ina plazza da tschien pertschien per la scoletta sin fundament dil diember da scolarets che s’augmenta ed in augment da 15 pertschien tiel pensum da pedel.