News-Details

La regiun duei daventar pli attractiva

07.04.2017

Per 65 entochen 70 milliuns francs construescha la Catrina Resort SA a Mustér in niev resort da vacanzas. Igl edifeci cuntegn denton era la stizun dil Coop, ina stizun da sport, dus restaurants ed in local plurivalent. Dapi che Marcus Weber ha surpriu la maioritad dallas aczias dallas Pendicularas Mustér SA ei vegniu moviment sil sectur turistic a Mustér. Suenter investiziuns a Caischavedra ed el menaschi digl anteriur hotel Baur ha el lantschau treis gronds projects: Il resort, la pendiculara nova da Sedrun sil Cuolm da Vi ed ils indrezs d’ennevar el territori da skis da Caischavedra–Péz Ault. In da quels sesanfla uss ella fasa dalla realisaziun. Igl ei il Resort Catrina alla staziun da val dallas pendicularas a S. Catrina.

600 letgs novs
Il resort cumpeglia 132 habitaziuns da vacanzas a duas combras ed otg habitaziuns a treis combras, duas habitaziuns da penthouse da luxus medemamein administradas, 28 combras dublas en hostel, sectur da wellness pils hosps dil resort, survigilonza per affons e local da divertiment pils giuvenils, medemamein dil resort. La garascha sutterrana porscha 142 plazs da parcar. Leutier vegn in sectur da parcar per velos. La capacitad totala dil resort porscha plaz a rodund 600 persunas, leutier vegnan ils 110 letgs dil Catrina Resort Hotel. Sco quei ch’igl investur e president dil cussegl d’administraziun, Marcus Weber, di duei il resort vegnir administraus directamein dallas Pendicularas Mustér SA: «Tut en tut vegnin nus a scaffir rodund 20 plazzas da lavur novas. Ina part da quellas persunas ei responsabla per emplenir il resort.» Medemamein el cumplex dil resort vegn ina nova stizun dil Coop cun ina surfatscha da 700 meters quadrat, ina stizun da sport cun 400 meters quadrat, in sectur da lavar chemic per agen diever e per tiarzs, dus restaurants ed in local plurivalent.

«Ei drova nova purschida»
Las investiziuns en letgs caulds ein per las Pendicularas Mustér SA da muntada existenziala. «Ils davos onns han differents menaschis da hotellaria serrau lur portas. In liung temps da pitir sil sectur turistic a Mustér va ussa denton a fin cun la realisaziun dil resort niev», puntuescha il president communal Robert Cajacob. Era per Weber eis ei clar: «Sche nus lein dumignar dapli glieud a Mustér stuein nus haver letgs e purschida attractiva.» El ei cunscients dalla problematica dil mument sin la fiera turistica: «Nus lein daventar in dils pli attractivs loghens per vacanzas da famiglias en Svizra. Persuenter drova ei prezis raschuneivels, ina buna purschida e qualitad.» Quei vul el buca mo contonscher pil temps d’unviern, mobein era per la stad. «Nus emblidein adina puspei tgei grondiusa destinaziun che Mustér ei duront la stad.
Per quei motiv lein nus far quella aunc pli attractiva. Diu ha dau a nus la natira. Ussa stuein nus procurar che mintgin sappi guder quella. Persuenter drova ei denton era professiunalitad ed amicabladad», puntuescha Weber. La pendiculara nova en planisaziun da Sedrun sil Cuolm da Vi lubeschi da contonscher in bellezia mund alpin senza pli gronds strapazs.

Fatg l’entschatta

En preschientscha dallas collaboraturas e dils collaboraturs dallas Pendicularas Mustér SA, dils cussegls d’administraziun, mo era d’autoritads communalas, ein las lavurs da baghegiar dil Resort Catrina vegnidas lantschadas la mesjamna sera. Ina cassetta cun entgins raps digl investur Marcus Weber ei vegnida satrada sigl areal dalla surbaghegiada nova. «Cun quei crap da fundament surschein nus alla generaziun, che vegn lu ad esser incaricada in di cun spazzar il baghetg, in segn da nies temps. Quei segn duei documentar il plascher e la luschezia da saver ereger cheu enzatgei niev», di Weber. Cajacob ha accentuau la mesjamna suentermiezdi la speronza ellas investiziuns novas: «Nus havein sperau ditg ch’ei vegni puspei investau a Mustér ell’infrastructura turistica. Uss eis ei aschi lunsch e nus havein plascher.» Il gie dil suveran igl atun vargau als credits pils edifecis turistics muossi che la vischnaunca hagi mai dau si la speronza e seigi promta da sustener l’iniziativa. La finamira
da Weber ei ina purschida inclusiva pils hosps futurs en collaboraziun cun l’entira destinaziun da vacanzas sisum la Surselva. Ina dallas finamiras ei d’elavurar egl avegnir pli intensivamein la fiera dalla regiun da Milaun. «Quella ha in potenzial dad otg milliuns habitonts», di Weber. Las autras fieras tradiziunalas sco la Tiaratudestga ni las tiaras dil Benelux duein tonaton buca vegnir negligidas.