Carli Fry ha studegiau al Seminari da spirituals a Cuera. Suenter sis onns sco caplon a Cavardiras ha el continuau ses studis a Friburg, nua ch’el ha promoviu 1929 en historia e litteratura. 1949 ha el retschiert dall’universitad Fribourg il tetel da teol. h.c. 1946 era el vegnius numnaus canoni buca-residenzial da Cuera. Finalmein ha el surpriu il beneficiat «Nossadunna dalla Glisch» a Trun, nua ch’el ha luvrau litterarmein e scientificamein duront 25 onns.
Oravontut l’historia svizra e quella dil Grischun ha Carli Fry perscrutau. Sia capo-ovra, la biografia en dus toms da casper Decurtins, ei cumparida 1949/1952. En conuschents ei Fry vegnius principalmein entras sias publicaziuns da caracter litterar e historic, sco era tras sias poesias e novellas, p. ex. «Dal temps da mia tatta», «Veta e vertid», «Ina catscha misteriusa»). Leutier ha Fry translatau en romontsch il Niev Testament. Buca d’emblidar ei Carli Fry sco poet dramatic. Ella «Tribuna Romontscha» ha el publicau 20 dramas. In’ovra monumentala ei la nova edicziun dalla «Consolaziun dall’olma devoziusa», ina rimnada da 221 canzuns religiusas ord la tradiziun dil temps medieval ella Surselva catolica.
carli Fry ei staus pastur dallas olmas poet, historiograf, criticher litterar e translatader, dasperas era interessaus politicamein ed activs sco schurnalist. Sia enorma forza da lavur steva en contradicziun cun sia sanadad sclavinada, che ha mudergiau el quasi l’entira veta. Aschia eis ei buca da far curvien ch’el s’occupava adina puspei cun la mort. Da quei dat denter auter la nova concepziun dil «Saltar dils morts» perdetga.
Ord il cudisch da Mustér «Temps vargai – Temps presents»