Il caplon legendar da Cavardiras, Placi Sigisbert Giger (1892–1950), ei staus in carstgaun che saveva fascinar tras sia buontad, pazienzia ed originalitad persunala, ton sco pastur dallas olmas, sco alpinist e pelegrin. Ils nums da batten ha el retschiert tier sia naschientscha, il di avon la fiasta da sogn Placi a Platta (Medel). Cuort suenter siu ordinariat, ils 21 da december 1919, sco nievinstallau plevon a Surcuolm, han ins fatg persenn da sias habilitads litteraras. Engaschaus per la giuventetgna e sia baselgia, scriva el – sper translaziuns – in agen drama «Sogn Alexi», ch’ei deplorablamein mai vegnius stampaus. Denton ei in’entira retscha d’atgnas ovras, il pli savens da cuntegn religius, cumparida, denter auter sur dil «Sogn da miraclas» – Antoni da Padua. Da 1927 tochen 1945 pastorescha sur Gigcr sco caplon da Cavardiras per «siu» sogn. Cavardiras daventa in «Pign Padua». Denton, sur Placi Giger tila ei irresistiblamein tier il «Padua grond». Leu sesanflan las reliquias dil sogn. A pei e persuls pelegrinesch’el 1932 a Padua. Pil viadi – ir e turnar – drov’el quater jamnas. Proclamond Papa Pius XI 1933 sco onn sogn cun perdun cumplein, pren caplon Giger danovamein il fest da viadi enta maun e marscha, ensemen cun in accumpignader duas gadas 700 kilometers, tier la fossa da sogn Pieder a Roma. Leu vegn el retscharts dil Papa en audienza privata; al Papa porta el in matg steilalvas, ch’el ha sez encuretg. Pertgei il grond pelegrin era medemamein in alpinist passiunau. Il mund alpin da sia regiun cnconuscheva il «Caplon dils glatschers» – aschia era il num da siu cudisch – sco avon ei forsa mo pader Placi a Spcscha, siu grond exempel.
Ord il cudisch da Mustér «Temps vargai – Temps presents»