Suenter ses studis gimnasials a Mustér e Sarnen ha Giusep Durschei studegiau teologia al Seminari da spirituals a Cuera. Lu ha el operau ellas pleivs da Sumvitg, Danis-Tavanasa e Sedrun. Naven da 1976 eis el staus tochen sia mort caplon a Segnas.
Da sias ovras seigi menziunau: il drama, «Corsin da Laret», «In'olma en combat», in drama religius, «Tratsch alpin», giug festiv, «L'alp striunada» (1951), «Golgota», drama religius (1956), «La crusch zuppada» (1958). Vitier vegnan translaziuns dil tudestg: «Eva-Maria», da J. Büchner, «L'in e scadin», da H. von Hofmannsthal, «Giuanna d'Arc», da F. Schiller, «Aram e Bela» da F. H. Achermann, «Ina veta en siemi» da F. Grillparzer, «Tell» da P. Schoeck, «Lumpazivabagundus» da Nestroy. Da 1950–1958 ei Durschei staus redactur dil «Pelegrin». 1975 vegn el honoraus cun il «Premi dil Radio retoromontsch». Plinavon ei era vegniu surdau ad el in premi da renconuschientscha dalla Fundaziun Schiller. Il december 1995 ha la Romania presentau cun in act festiv a Segnas l'ovra «Aulza ti'egliada», illustrada da Linus Flepp.
Ord il cudisch da Mustér «Temps vargai – Temps presents»