Gion Battesta Sialm ha visitau la Scola claustrala ed era leu scolar da pader Maurus Carnot. La matura ha Sialm acquistau a Nossadunnaun, silsuenter eis el entraus el Seminari da spirituals a Cuera. Sco caplon da Curaglia ha el entschiet cun la perscrutaziun e presentaziun dils monuments d'art dalla valada. Pli tard ha el operau sco plevon en differents loghens e sededicaus oravontut alla bellestrica. Per sia raquintaziun «Sur Valentin», ha el retschiert cun caschun d'ina concurrenza litterara dalla Romania igl emprem premi. Medemamein premiada ei la novella cuorta «Il Toni pign». Mo las capoovras da Sialm ein «Schiember grischun» I e II, «Span e debat» I e II ed ina rimnada da poesias «Giud crunamatg» cun rodund 150 poesias. Era ha el translatau tocs humoristics e dramas, ha sez scret diversas lavurs per la tribuna, aschia p. ex. «Mund, narr e bagat», «Sil baun da sburlar», «Il mat modern». Pliras poesias ein vegnidas cumponidas, p. ex. da siu frar Duri Sialm. «La canzun dil signun» ei bein la pli enconuschenta poesia ord la plema da Sialm, demai ch'ella po «sco strusch ina secund'ovra ella litteratura da gliez temps tschaffar il spért dil temps ed exprimer la posiziun sociala dils purs en relaziun cun lur ambient» (Deplazes).

Ord il cudisch da Mustér «Temps vargai – Temps presents»