Baselgia da s. Clau e s. Silvester a Mumpé-Tujetsch
da Gion Tenner, Segnas
Mumpé-Tujetsch – in vitg puril
Denter Segnas e Bugnei, avon ils cunfins communals dallas duas viuschnauncas Disentis/Mustér e Tujetsch schai sin ina terassa sulegliva il vitg puril da Mumpé-Tujetsch. Il vitg che consista ord rodund 40 baghetgs schai sin in altezia da 1390 meters sur mar. Aschia ei el la pli aulta fracziun dalla vischnaunca da Mustér.
Politicamein fuorma il vitget in agen vischinadi. Deplorablamein ein la scola e l' ustria da pli baul svanidas. Aschia ha il vitg piars bia da sia veta. Ils scolars han da serender a Segnas e Mustér a scola. Tuttina fan ils muossavias sin via principala e la staziun dalla Viafier Furca-Alpsu endament l' existenza digl uclaun ch' ins vesa schiglioc mo da vegnir neu da Mustér.
Historicamein ha Mumpé-Tujetsch giugau pli baul ina rolla fetg impurtonta. aschia entupein nus il num gia baul ella historia, numnadamein el 11avel tschentaner. Lu era Mumpé-Tujetsch liug da hospezi e midada dils cavals che vevan aunc in stregn viadi avon els. A Mumpé-Tujetsch deva ei ina suschna. Il liug era pia in punct fetg impurtont dalla via romana sur il Pass d' Ursera.
La baselgia da s. Clau e s. Silvester
Amiez il vitg, bein sin la prada la pli plauna, schai in sanctuari dedicaus a s. Clau ed a s. Silvester. Sco era en auters loghens da nossa vischnaunca astgein nus supponer in sanctuari gia baul e cunquei ch' il vitg ei ualti vegls datava quel franc gia dil 11/12avel tschentner1)
Il pli vegl mussament per in sanctuari sesanfla aunc oz a Mumpé-Tujetsch. Ei setracta cheu dil zenn pign che porta il datum 16162). La caplutta sezza datescha tenor Pöschel digl onn 1760.
Supposiziuns en connex cun la restauraziun 1993/94
• probablamein era l' entrada inagada encunter ost (quei encunter la regla!)
• l' entrada ei ornada cun maletgs ni ornaments
• era la fassada ei per part ornada cun maletgs
• datum 1859 midada dalla caplutta
• cunquei che quest sanctuari ei baghegiaus el medem stil sco Acletta e Segnas astgan ins era supponer maletgs el chor
Cronica
1616 da quei onn datescha il zenn piogn
1646 Ils altars laterals portan quei datum
1713 malegia S. Frey il malett digl altar grond
1730 Il zenn grond ei vegnius culaus
1760 Il caplutta hodierna vegn erregida
1767 Las parts lateralas digl altar grond vegnan construidas
Notizias e problems
• Tier ils datums dils altars nudai tier E. Pöschel dat ei problems. Pér la restauraziun da quels vegn a mussar tgei tocca che s' auda tier tgeinins.
1) mira era retschercas fatgas en connex cun la baselgia da Segnas
2) E. Pöschel: Die Kunstdenkmäler des kantons Graubünden, tom V, p. 124