News-Details

Gion Hosang niev menader dil CSC

12.12.2017

(anr/hh) Gion Hosang surpren la funcziun da menader dil Center da sport e cultura (CSC) a Mustér. El daventa successur da Herbert Schmelzer che banduna il menaschi la fin d’avrel 2018. Hosang ch’ei vegnius eligius en quella funcziun dalla cumissiun da menaschi dil center ha luvrau ils davos rodund dudisch onns tier Radiotelevisiun Svizra Rumantscha. Leu ha el adempliu differentas funcziuns, denter auter eis el staus menader dalla redacziun online. Ils davos onns eis el staus correspondent a Mustér. Hosang ch’ei carschius si e che viva a Mustér ei denton era s’engaschaus ils davos onns en pliras uniuns ed organisaziuns. Aschia eis el era staus involvius ell’organisaziun da plirs gronds arranschaments el Center da sport e cultura a Mustér. Sco quei che la cumissiun da menaschi scriva en ina communicaziun als mieds da massa ademplescha il niev menader denton era ils criteris professiunals per menar cun success il center egl avegnir. Hosang ha empriu oriundamein da cuschinier, pli tard informaticher. Omisduas professiuns ein da grond’impurtonza pil center. D’ina vart per quei ch’il menaschi porscha era ina cuschina. Dall’autra vart ein gest las habilitads d’informatica d’impurtonza el mund dalla multimedia e communicaziun, seigi medias socialas sco relaziuns publicas e cun mieds da massa. Sco quei che la cumissiun da menaschi scriva ei Hosang vegnius eligius ord numerusas e valablas annunzias d’indigens e persunas d’ordeifer la vischnaunca. Il president dalla cumissiun, gerau Clemens Berther, ei satisfatgs dalla tscharna: «Cun Gion Hosang havein nus anflau ina persuna che ha las habilitads ch’ei drova per menar nies Center da sport e cultura. Igl ei reussiu d’eleger ina persuna che s’engascha e che ha fermas ragischs ella regiun.»